A$AP Rocky-მ კიდევ ერთხელ დააინტრიგა გულშემატკივრები იმის შესახებ, გაიკეთებს თუ არა საქორწინო ბეჭედს. Perfect-თან ახალ ინტერვიუში რეპერმა პროვოკაციული განცხადება გააკეთა თავის დიდი ხნის სიყვარულზე, რიანაზე, რომელთანაც მას სამი მცირეწლოვანი შვილი ჰყავს. როცა მუსიკოსს სთხოვეს, აღეწერა მომენტი, როცა ყველაზე დიდ კმაყოფილებასა და ბედნიერებას გრძნობს, 37 წლის როკიმ უპასუხა: „ვფიქრობ, სიმშვიდე მაბედნიერებს. ვიყო მამა, პარტნიორი და მოსიყვარულე ქმარი – ეს არის, რაც ბედნიერს მხდის.”
პასუხის პროვოკაციულობა კი სიტყვებში „მოსიყვარულე ქმარი” იმალება, რადგან წყვილს აქამდე საჯაროდ არასდროს დაუდასტურებია მათი ოფიციალური სტატუსი.
„ესაა, რაც სინამდვილეში მოტივაციას მაძლევს, რომ გამოვხატო ჩემი თავი შემოქმედებითად, ვიყო ოჯახის კაცი და ვიყო ხელოვანი,” – ამბობს როკი, რომელმაც ჟურნალთან ჩანიშნული ინტერვიუს დრო გადადო, რადგან ერთ-ერთი შვილის დაბადების დღის წვეულებისთვის მზადებით იყო დაკავებული.
ეს არ არის პირველი შემთხვევა, როცა რეპერმა მინიშნება გააკეთა, რომ წყვილი, შესაძლოა, უკვე ოფიციალურად იყოს დაქორწინებული. სექტემებრში Elle-თან ინტერვიუში მან ასეთი რამ თქვა: „რა იცით, რომ უკვე ქმარი არ ვარ? ამას ჯერ მაინც არ დავადასტურებ.” პარიზში კი, Cannes Lions ფესტივალზე, როკიმ თავისი 2022 წლის სიმღერა D.M.B., მისი თქმით, თავის ცოლს მიუძღვნა.
წყვილს, რომელის 2020 წლიდან ერთადაა, ურთიერთობა საჯაროდ ჯერ არ გაუოფიციალურებია. თუმცა სწორედ D.M.B.-ს ვიდეოკლიპის ბოლო სცენაში როკისა და წითელ კაბაში გამოწყობილ რიანას ვხედავთ, რომლებიც ქორწინდებიან.
მიუხედავად ეპიკური წარმატების წლისა, რეპერმა ინტერვიუში აღნიშნა, რომ ახალდაბადებული ქალიშვილი მისი აქამდე არსებული ყველაზე საყვარელი პროექტია. რიანა და როკი ქალიშვილის მშობლები 13 სექტემბერს გახდნენ. მანამდე წყვილს ორი ვაჟი ჰყავდა – 3 წლის RZA და ორი წლის რაიოტ როუზი.
