ლიამ გალაგერმა გააკრიტიკა ფანი, რომელმაც Oasis-ის ტურნეს პირველი ავსტრალიური კონცერტის დროს, შუშხუნა, ე.წ. ფლეარები გაუშვა ხალხში. შემთხვევა პირველ ნოემბერს მელბურნის Marvel Stadium-ზე მოხდა. მუსიკოსი მსმენელის ქცევას სოციალურ ქსელში გამოეხმაურა და უარყოფით კონტექტში მოიხსენია.
ინციდენტი საღამოს ბოლო სიმღერის – Champagne Supernova-ს შესრულებისას მოხდა. ერთ-ერთმა მსმენელმა ავსტრალიურ გამოცემა news.com.au-ს უთხრა, რომ შუშხუნებმა ხალხი შეაშინა: „ყოველ ჯერზე, როცა ეს ნათება ჩნდებოდა, პატარა ხანძარს ჰგავდა,” – ამბობს ვირჯინია, რომელიც შოუს 13 წლის ქალიშვილთან ერთად ესწრებოდა და უსაფრთხოების გამო მათ კონცერტის დასრულებამდე დატოვეს სივრცე.
გავრცელებული ინფორმაციით, უსაფრთხოების სამსახური შესასვლელთან ჩანთებს საფუძვლიანად ამოწმებდა, თუმცა უცნობია, როგორ შეიტანეს ფლეარები დარბაზში და დაშავდა თუ არა ვინმე. Marvel Stadium-ს კომენტარი ჯერ არ გაუკეთებია.
„ვინც გუშინ მელბურნში ფლეარი ხალხში ააგდო,” – მიმართა მუსიკოსმა მსმენელს. „აუცილებლად მოგეთხოვება პასუხი, დამიჯერე,” – წერს ლიამ გალაგერი სოციალურ ქსელ X-ზე.
როგორც იუწყებიან, გამოსვლის დროს ლიამი აშკარად გაღიზიანდა – სცენიდან თითს აქნევდა და მომხდარს აპროტესტებდა. მისი ძმა, ნოელ გალაგერიც შეშფოთებული იყო, თუმცა ბენდმა მუსიკალური ნომრის შესრულება განაგრძო.
მელბურნის კონცერტი Oasis-ის დიდი ხნის ნანატრი Live 25 ტურნეს პირველი შოუ იყო ავსტრალიაში. ჯგუფი მელბურნში სამ კონცერტს, სიდნეის Accor Stadium-ზე კი ორ შოუს გამართავს.
სცენაზე გასვლამდე ლიამმა ფანებს მიმართა: „მოგენატრეთ? ჩვენ კი ნამდვილად მიგვნატრებიხართ თქვენ!“ კონცერტს უამრავი ადამიანი ესწრებოდა – ზოგი გულშემატკივარი დილის 5 საათიდან რიგში იდგა, რათა პირველ რიგებში მოხვედრილიყო.
