უკვე ცნობილია, ვინ ითამაშებს The Beatles-ის თითოეული წევრის სასიყვარულო პარტნიორის როლს დაანონსებულ ოთხნაწილიან ბიოგრაფიულ ფილმში და ამ მსახიობების შემადგენლობა მართლაც შთამბეჭდავია.
The Beatles – A Four-Film Cinematic Event ავრცელებს, რომ სირშა რონანი განასახიერებს პოლ მაკარტნის მეუღლის, ლინდა მაკარტნის პერსონაჟს; ანა სავალი ჯონ ლენონის მეუღლის, იოკო ონოს როლზე დამტკიცდა; The White Lotus-ის ემი ლუ ვუდი ჯორჯ ჰარისონის მეუღლის, პეტი ბოიდის როლს შეასრულებს; ხოლო მია მაკკენა-ბრუსი რინგო სტარის მეუღლის, მორინ სტარკის პერსონაჟს შექმნის.
მსახიობები შეუერთდებიან პოლ მესკალს (მაკარტნი), ჰარის დიკინსონს (ლენონი), ბერი კეოგანს (სტარი) და ჯოზეფ კუინს (ჰარისონი).
„მორინი, ლინდა, იოკო და პეტი საოცრად საინტერესო და უნიკალური ფიგურები არიან და ძალიან მიხარია, რომ დღევანდელი კინოინდუსტრიის ერთ-ერთი ყველაზე ნიჭიერი ქალები შემოგვიერთდებიან ამ თავგადასავალში,“ – წერია რეჟისორ სემ მენდესის განცხადებაში.
The Beatles-ის ბიოგრაფიული ფილმების ჩვენება კინოთეატრებში 2028 წლის აპრილიდან დაიწყება. მენდესი ოთხივე ფილმს ბენდის თითოეული წევრის პერსპექტივიდან გადაიღებს. პრესრელიზის მიხედვით, ეპიზოდები ერთმანეთთან გადაიკვეთება და მთლიანობაში ჯგუფის სრული ისტორიის ერთიანი ნარატივის შექმნას შეძლებს.
ეს იქნება პირველი შემთხვევა, როდესაც The Beatles-მა და Apple Corps Ltd.-მა ოფიციალურად გასცეს ნებართვა, ჯგუფის წევრების ცხოვრების ისტორიები და მუსიკა მხატვრულ ფილმში გამოიყენონ. პროექტს Sony Pictures აფინანსებს და დისტრიბუციის უფლებაც მასვე ეკუთვნის.
