ჰილარი დაფმა მუსიკალურ კარიერაში დაბრუნება ოფიციალურად 3 ნოემბერს დააანონსა. მისი თქმით, ათწლიანი პაუზის შემდეგ ახალი სინგლის, Mature-ის გამოქვეყნებას 6 ნოემბერს გეგმავს.
Disney Channel-ის ყოფილი ვარსკვლავი 2015 წლის ალბომ Breathe In., Breathe Out-ის შემდეგ პირველი ახალი მუსიკალური ნამუშევრით ბრუნდება.
სინგლ Mature-ის გარეკანზე მომღერლის ემოციური პორტრეტია წარმოდგენილი: „ძალიან მიხარია, რომ საბოლოოდ შეგიძლიათ ამის მოსმენა, ამ სიმღერას დიდხანს ვმალავდი,“ – წერს ის ინსტაგრამის პოსტში.
ბოლო ათი წლის განმავლობაში ჰილარი დაფმა საკუთარი კარიერა უმეტესად მსახიობობას დაუთმო, სატელევიზიო სერიალებში How I Met Your Father და Younger იგი მთავარი როლის შემსრულებელი იყო.
ახლა კი, მუსიკასთან ერთად, დოკუმენტური სერიალიც მზადდება, რომელიც ხანგრძლივი მუსიკალური პაუზის შემდეგ არტისტის ახალ გზას და პირად ისტორიებს ასახავს.
აღსანიშნავია, რომ ჰილარი დაფი მრავალი წელია, ლგბტქ+ საზოგადოების ერთ-ერთი მხარდამჭერია. ჟურნალ Variety-სთან ინტერვიუში მან განაცხადა, რომ ეს მუსიკალური დაბრუნება თავის გულშემატკივრებს ეძღვნება: „თქვენ იცით, რომ ეს ყველაფერი მათთვისაა. მე მინდა, რომ მათ მოვწონდე.” – თქვა ჰილარი დაფმა, როცა ლგბტქ+ გულშემატკივრების შესახებ ჰკითხეს.
ამავე ინტერვიუში მან აღნიშნა, რომ ახალი მუსიკა „ძალიან მალე“ გამოვა და რომ ბოლო პერიოდში სტუდიაში თავის მეუღლესთან, მომღერალ და პროდიუსერ მეთიუ კომასთან ერთად მუშაობს.
დოკუმენტური სერიალის აღმასრულებელი პროდიუსერია გრემის ნომინირებული რეჟისორი სემ ურენჩი, რომელმაც Taylor Swift: The Eras Tour გადაიღო. „ფილმი მაყურებელს საშუალებას მისცემს, კიდევ უფრო ახლოდან გაიცნოს ჰილარი დაფის მუსიკალური დაბრუნება და მისი პირადი ცხოვრებისეული გზა.“ – ნათქვამია პრეს-რელიზში.
ფილმში გამოყენებული იქნება რეალური კადრები, ინტერვიუები, მუსიკალური შესრულებები და ვიდეოები არტისტის პირადი არქივიდან.
პოპვარსკვლავმა და მსახიობმა პოპულარობა 2000-იანი წლების დასაწყისში Disney Channel-ის სერიალ Lizzie McGuire-ით მოიპოვა, შემდეგ კი წარმატებით გადაინაცვლა პოპმუსიკაში. მისი ცნობილი ჰიტებია: Come Clean და Wake Up, რომლებიც Billboard-ის Hot 100 ჩარტშიც მოხვდა.
