ამ კვირის Adult R&B-ის რადიოჩარტი პოტენციურად ისტორიულ მოვლენას მოიცავს, შენაია მონეს სიმღერის, How Was I Supposed to Know?-ს წყალობით.
რა განსხვავებაა აღნიშნულ სიმღერასა და დანარჩენ 103 კომპოზიციას შორის, რომელიც მხოლოდ ამ წელწადის განმავლობაში შევიდა ჩარტში? საქმე ის არის, რომ შენაია მონე ხელოვნური ინტელექტის მიერ გენერირებული არტისტია – პროდუქტი, რომელიც პოეტმა ტელიშა ჯონსმა შექმნა. ეს კი პირველი შემთხვევაა, როცა ხელოვნური ინტელექტით შექმნილი არტისტი „ბილბორდის” ჩარტში მოხვდა. აღნიშნული პრეცედენტი კიდევ ერთ წინ გადადგმულ ნაბიჯს წარმოადგენს ხელოვნურ ინტელექტსა და მუსიკალურ ინდუსტრიას შორის ურთიერთობის განვითარებაში.
სიმღერამ პირველად საჯარო ყურადღება „ტიკტოკსა” და სხვა სოციალურ ქსელებში მიიპყრო, სადაც ის ვირუსულად გავრცელდა. ამ პოპულარობამ კი განაპირობა ის, რომ How Was I Supposed to Know? ლიდერი გახდა 20 სექტემბრით დათარიღებულ R&B ციფრული სიმღერების გაყიდვების ჩარტში, ერთი კვირის შემდეგ კი მე-20 ადგილით Hot R&B სიმღერების ჩარტშიც შევიდა.
ხელოვნური ინტელექტის მიერ შექმნილი პროდუქტის ამგვარმა გავრცელებამ მძაფრი პოლემიკა გამოიწვია მის მომხრეებსა და მოწინააღმდეგებს შორის. მოწინააღმდეგეთა ფრთაში იყვნენ მუსიკოსები SZA და Kehlani.
მომავლის ტექნოლოგიების გამოყენებით შექმნილი პროდუქტის რადიოში პოპულარიზაცია, შესაძლოა, ერთი შეხედვით, მოძველებულ მეთოდად ჩანდეს, თუმცა მონეს გუნდი ამას სწორ გადაწყვეტილებად მიიჩნევს. „მისი სიმღერა მასებს მოსწონთ. სწორედ ეს იყო ჩვენი მარტივი ფორმულა,” – ამბობს მონეს მენეჯერი. „ჩვენ რომ გვყოლოდა, ასე ვთქვათ, ტრადიციული არტისტი, ვყოფილიყავით ლეიბლი და მარკეტინგის მენეჯერები, რადიო აუცილებლად იქნებოდა ჩვენი სტრატეგიის ერთ-ერთი ნაწილი. ჩვენი ინტერესია, მუსიკა რაც შეიძლება მეტ ადამიანამდე მივიტანოთ. ჩვენი მიზანია, ზრდა განვაგრძოთ, დავუკავშირდეთ ადამიანებს და იმედი გვაქვს, პირველ პოზიციასაც მივაღწევთ.”
მიუხედავად იმისა, რომ დღეს მთავარი განხილვის თემა მონე გახდა, ის არ არის ხელოვნური ინტელექტის მიერ შექმნილი ერთადერთი მუსიკალური აქტი, რომელსაც „ბილბორდის” ჩარტებზე აქვს გავლენა. ახალი არტისტების ჩარტი უკვე გახდა მსგავსი აქტების ნავსაყუდელი და ბოლო კვირების განმავლობაში რამდენიმე მათგანი ჩარტის სხვადასხვა ადგილზეც მოხვდა. ეს კონკრეტული მაგალითები უკვე ნათლად გვიჩვენებს ხელოვნური ინტელექტით შექმნილი არტისტების მიერ მუსიკალური ინდუსტრიის შესაძლო ტრანსფორმაციის ტენდენციას.
ამ ყველაფრის ფონზე კი შენაია მონეს მენეჯერი საზოგადოებას ურჩევს, პროდუქტი მხოლოდ მუსიკალური პერსპექტივით შეაფასონ: „წარმოიდგინეთ, რომ რადიოს პროგრამების ხელმძღვანელი ხართ, უბრალოდ მუსიკის ფანი, კოლეგა, არტისტი… უბრალოდ მოუსმინეთ სიმღერებს, მოუსმინეთ ტექსტებს და მხოლოდ ამის შემდეგ განსაჯეთ.”
