ბრიტნი სპირსის ინსტაგრამი კიდევ ერთხელ ჩაბნელდა. ფანებს, რომლებიც მომღერლის ანგარიშზე შესვლას ცდილობენ, ხვდებათ წარწერა: „ანგარიში მიუწვდომელია. შესაძლოა, ბმული გატეხილია, ან ანგარიში – გაუქმებული.”
სხვადასხვა ინფორმაციის თანახმად, სპირსი ინსტაგრამიდან შაბათ-კვირას გაქრა – ორი კვირის შემდეგ, რაც მომღერლის ყოფილმა მეუღლემ კევინ ფედერლაინმა გამოსცა მემუარები, სახელწოდებით You Thought You Knew. წიგნში მოცემულია სკანდალური ისტორიები, რომლებშიც პოპვარსკვლავი ფიგურირებს.
აღნიშნულთან დაკავშირებით კომენტარი არ გაუკეთებია თავად სპირსს. ეს არ არის პირველი შემთხვევა, როცა მომღერალი სოციალურ ქსელში აღარ იძებნება. პირველად მან ანგარიში 2021 წელს გააუქმა, შემდეგ 2022 წელს – ორჯერ. ბოლო წლების განმავლობაში კი მისი ინსტაგრამ გვერდი პერიოდულად ქრებოდა.
ბოლო შემთხვევას კი წინ უძღოდა სპირსის რამდენიმე ემოციური პოსტი, რომელიც ფედერლაინის წიგნში წაყენებულ ბრალდებებს ეხებოდა: „ამ ეტაპზე ამბების მოყოლა სახალისოც კია. ეს ყოველივე შეიძლება სულელურად ჟღერდეს, მაგრამ ყველა იმ ნაგვის ფონზე, რაც კი ჩემზე ითქვა, რატომ არ შეიძლება, ამ ყველაფერს შინაარსი შევმატოთ,” – წერდა სპირსი. მანამდე მომღერალმა კიდევ ერთი განცხადება გააკეთა ყოფილ მეუღლეზე და ის „განუწყვეტელ ცეცხლის შენთებაში” დაადანაშაულა.
რამდენიმე დღით ადრე კი მომღერალმა იმ ადამიანებზე დაწერა, ვინც, მისი თქმით, მისი ტკივილით სარგებლობენ. სპირსს კონკრეტული ადამიანები არ დაუსახელებია, თუმცა, როგორც ჩანს, ის ფედერლაინთან ფინანსურ სიტუაციას გულისხმობდა: „უკვე ხუთი წელია, ბრიტნისგან ფული არ მიგიღიათ და ახლა ცდილობთ, სხვა გზით მოიპოვოთ ანაზღაურება? მთელი ამერიკა ამას ამბობს: ‘ორივემ ხომ თქვენ-თქვენი გზა განაგრძეთ, შვილებიც სრულწლოვნები არიან და ახლა უკვე სამყაროც სხვანაირია… რატომ არის ის მაინც ასეთი გაბრაზებული?!’”
People-ის ინფორმაციით, ბრიტნის ფანები მომღერლის ბოლოდროინდელი მდგომარეობის გამო წუხან. სოციალურ ქსელში ის განაგრძობდა სავიზიტო ცეკვის ვიდეოების გაზიარებასა და დაშიფრული მესიჯების წერას თავის ორ ვაჟზე – 20 წლის შონ პრესტონსა და 19 წლის ჯეიდენ ჯეიმსზე. 7 ოქტომბერს გავრცელებულ ვიდეოში კი სპირსს ორივე ხელი და მარჯვენა მუხლი შეხვეული აქვს, მკლავზე კი ნაიარევები ემჩნევა. „ჩემი მეგობრის სახლში წავიქეცი… ეს საშინელება იყო,” – დაწერა მან „ტიკტოკზე”.
19 ოქტომბერს სპირსმა ოთხთვიანი რეაბილიტაციის შესახებ ისაუბრა, რომელიც 2018 წელს გაიარა, როცა ჯერ კიდევ 13-წლიანი მეურვეობის ქვეშ იყო. „ნამდვილად ვიცი, რომ ფრთები წამერთვა და ტვინის დაზიანებაც დიდი ხნის წინ მივიღე… ცხოვრების ამ რთული პერიოდის შემდეგ მე, რა თქმა უნდა, სვლა განვაგრძე და ბედნიერი ვარ, რომ ცოცხალი ვარ,” – დაწერა მან, თუმცა არ დაუკონკრეტებია, როდის ან რა ტიპის ტვინის დაზიანება აქვს მიღებული.
ფედერლაინის მემუარები არაერთ შოკისმომგვრელ განცხადებას მოიცავს სპირსის შესახებ, მათ შორის ბრალდებას, რომ ის ორსულობისას ალკოჰოლს, ხოლო ლაქტაციის დროს ნარკოტიკს მოიხმარდა.
სპირსის გუნდი წიგნიდან გაჟონილ ინფორმაციას ჯერ კიდევ მის გამოქვეყნებამდე გამოეხმაურა: „ფედერლაინი და სხვები კიდევ ერთხელ ცდილობენ ბრიტნისგან სარგებლის მიღებას და, სამწუხაროდ, ეს სწორედ მას შემდეგ მოხდა, რაც კევინზე ბავშვების მიმართ დაკისრებული ფინანსური პასუხისგმებლობა დასრულდა. ერთადერთი, რაც ახლა ბრიტნის აინტერესებს, მისი შვილები შონ პრესტონი და ჯეიდენ ჯეიმსი არიან და მათი კეთილდღეობა ამ სენსაციურობის ფონზე. მან საკუთარი გამოცდილება უკვე დეტალურად გააზიარა თავის მემუარებში.”
