2025 წლის მერობის არჩევნებში ზოჰრან მამდანის გამარჯვებას უამრავი ნიუ-იორკელი ზეიმობს, მათ შორის ისეთი ცნობილი მუსიკოსები, როგორებიც არიან გრეისი აბრამსი, ჰოლზი და სხვები.
34 წლის დემოკრატ-სოციალისტის ტრიუმფს, რომელმაც არჩევნებში ენდრიუ კუომო და კერტის ლივა დაამარცხა, სოციალურ მედიაში არაერთი ვარსკვლავი გამოეხმაურა მილოცვის წერილებით. აბრამსმა მამდანის გამარჯვებას ინსტაგრამზე რამდენიმე პოსტი მიუძღვნა. მისი თქმით, ახალი ამბის გაგებისას ის სიხარულისგან ყვიროდა. „ყოველ ჯერზე მბურძგლავს,” – დაწერა მომღერალმა.
არჩევნების შედეგებს X-ზე გამოეხმაურა ჰოლზიც: „ამ წუთას ჩამოვედი სცენიდან საოცარი შოუს შემდეგ და ზოჰრან მამდანი ნიუ-იორკის მერია. ღამე ვეღარ დავიძინებ!”
არჩევნების შედეგზე პოსტი გამოაქვეყნა ასევე ლორდმაც: „ცვლილება… კარგ დღეს გისურვებთ,” – დაწერა მან და მამდანის გვერდი მონიშნა.
ყველა აღნიშნული მუსიკოსი ნიუ-იორკში ცხოვრობს, სადაც მამდანიმ არჩევნებში 1 036 051 ხმით გაიმარჯვა. ქალაქში ცხოვრების ხარჯების შემცირებაზე ორიენტირებული კამპანიით მან ხმების 50.4% მიიღო, კუომომ და სილვამ კი 41.6% და 7.1% გაინაწილეს.
მამდანის მერად არჩევა სოციალურ ქსელში ბევრმა სხვა მუსიკოსმაც იზეიმა, მათ შორის იყვნენ Clairo და ლიზი მაკალპინი.
„ის სახლშია,” – დაწერა რეიჩელ ზეგლერმა. King Princess-მა კი დააკომენტარა: „მგონი, წვეულება უნდა გავმართოთ, არა?”
ნიუ-იორკის მერობის არჩევნებში ზოჰრან მამდანის მხარს უჭერდნენ ისეთი პოლიტიკოსები, როგორებიც არიან ბერნი სანდერსი და ალექსანდრია ოკასიო-კორტესი. უგანდაში დაბადებულმა იმიგრანტმა თავისი საარჩევნო კამპანიის სტრატეგიაში აქტიურად ჩართო სოციალური მედია და პოპკულტურა. ერთ მომენტში ის სცენაზეც კი გამოვიდა PinkPantheress-ის კონცერტზე, ბრუკლინში.
მამდანიმ, არც მეტი, არც ნაკლები, სვიფტის ფანების გულების მოგებაც მოახერხა. როცა მას სთხოვეს, თავისი საარჩევნო კამპანია სიმღერებით დაეხასიათებინა, ერთ-ერთ სიმღერად მან სწორედ ტეილორ სვიფტის Only the Young დაასახელა, The Game-ისა და 50 Cent-ის Hate It or Love It-სა და Lil Wayn-ისა და დრეიკის Right Above It-თან ერთად.
