მეგ უაიტმა როკ-ენ-როლის დიდების დარბაზის ცერემონია გამოტოვა, რომელში შესვლის პატივიც ჯეკ უაიტთან მის საკულტო დუეტს, White Stripes-ს ხვდა წილად. თუმცა მისი არყოფნის მიუხედავად, ჯეკის სიტყვა სწორედ მეგით დაიწყო და დასრულდა.
„მეგს რამდენიმე დღის წინ ვესაუბრე,” – თქვა უაიტმა. „მას სურდა, თქვენთვის გადმომეცა, რომ ძალიან მადლიერია ყველასი, ვინც მას მთელი ეს წლები მხარს უჭერდით. დღეს ეს ძალიან ბევრს ნიშნავს მისთვის.”
„მან ჩემი სიტყვა წინასწარ დააკორექტირა,” – დაამატა ჯეკმა თავისი სამადლობელი სიტყვის შესახებ, რომელიც მან დუეტის სახელით წარმოთქვა. „ბევრი პუნქტუაციური შესწორებაც შეიტანა.”
მიუხედავად იმისა, რომ უაიტის ემოციები მთელი სიტყვის განმავლობაში თვალსაჩინო იყო, ყველაზე მეტად ის მის მიერ წაკითხულ პოემაში იგრძნობოდა, რომელიც, მისი თქმით, ადრე მეგისთვის უნდა გაეგზავნა, მაგრამ ეს არ გაუკეთებია. „ამის ნაცვლად კი, ვიფიქრე, დღეს თქვენთვის წამეკითხა,” – თქვა მან.
პოემა პატარა ბიჭსა და გოგოზეა, რომლებიც საკუთარი ხელებით თავიანთი ფანტაზიის სამყაროს აგებენ. ხალხი კი მათ უარყოფითად, დაცინვითა და ქვების სროლით ხვდება. ბავშვებს მხოლოდ ერთადერთი ადამიანი უღიმით, რაც მათ გაგრძელების ძალას აძლევს. ის ერთი უცნობი ადამიანი კი საბოლოოდ ღმერთი აღმოჩნდება.
GIE KNAEPS/GETTY IMAGES
White Stripes-ის სახელის ქვეშ ჯეკს და მეგს ერთად ექვსი ალბომი აქვთ გამოცემული, მათ შორისაა გრემის მფლობელი Icky Thump. მათი გზები 2011 წელს გაიყო. მეგი ამჟამად ჩრდილში ყოფნას ამჯობინებს.
ჯეკის სიტყვის შემდეგ ოლივია როდრიგომ და Feist-მა დუეტის 2002 წლის სიმღერა We’re Going to Be Friends შეასრულეს, 21 Pilots-მა კი White Stripes-ს 2003 წლის Seven Nation Army-ის სიმღერით მიაგო პატივი.
როდრიგოს არაერთხელ გაუმხელია, რომ White Stripes მისი საყვარელი ბენდია. „იმდენად შეპყრობილი ვიყავი ჯეკ უაიტის გიტარით, დედაჩემს ჩემი გიტარის გაკვეთილებზე ტარება დავაწყებინე, რათა ამ სიმღერების დაკვრა მესწავლა,” – ამბობდა მომღერალი 2021 წლის ინტერვიუში. მისი თქმით, Fell in Love With a Girl იყო მისი ერთ-ერთი პირველი სიმღერა, რომლის დაკვრაც ისწავლა. როდგირო თავის საყვარელ მუსიკოსს პირველად 2022 წელს შეხვდა.
KEVIN MAZUR/GETTY IMAGES FOR RRHOF
2025 წლის როკ-ენ-როლის დიდების დარბაზის ცერემონიაზე ასევე პატივი მიაგეს Bad Company-ს, ჩაბი ჩეკერს, ჯო კოკერს, სინდი ლოპერს, OutKast-სა და Soundgarden-ს – საშემსრულებლო კატეგორიაში; Salt-N-Pepa-სა და უორენ ზევონს – მუსიკალური გავლენისთვის; ტომ ბელს, ნიკი ჰოპკინსსა და კაროლ კეის – მუსიკალური სრულყოფილებისთვის; ხოლო ლენი უარონკერს აჰმერ ერტეგიუნის ჯილდო გადაეცა.
