8 ნოემბერს Soundgarden ოფიციალურად შეიყვანეს როკ-ენ-როლის დიდების დარბაზში. ჯგუფის ახალი სტატუსი ცერემონიაზე მსახიობმა და კომედიანტმა ჯიმ ქერიმ წარადგინა. მან ემოციური, პირადი გამოცდილებით სავსე სიტყვით გაიხსენა, როგორ მიუსმინა ჯგუფს პირველად კონცერტზე.
ლოს-ანჯელესში, Peacock Theater-ის სცენაზე, ქერიმ მაყურებლებს გაუმხილა, რომ პირველად Soundgarden-ის წევრებს 1996 წელს შეხვდა, როცა Saturday Night Live-ს უძღვებოდა და სპეციალურად თავად მოითხოვა, რომ შოუს მუსიკალური სტუმარი სწორედ ისინი ყოფილიყვნენ.
„იმ დროს შემადგენლობა იყო კრისი [კორნელი], კიმ თაილი, მეტ კამერონი დრამებზე და ბენ შეპარდი ბასზე. მათ დაუკრეს ბნელი, მშვენიერი და ეპიკური Pretty Noose,“ – თქვა ქერიმ.
ჯიმ ქერიმ ასევე გაიხსენა, რომ შოუს შემდეგ ჯგუფმა მას ერთ-ერთი ყველაზე ძვირფასი ნივთი აჩუქა – Fender Telecaster-ის ელექტრო გიტარა ოთხივე წევრის, მათ შორის უკვე გარდაცვლილი ფრონტმენის, კრის კორნელის ხელმოწერით.
მამისადმი მიძღვნილი ვიდეოს ჩვენების შემდეგ სცენაზე ავიდა კორნელის უფროსი ქალიშვილი, ლილი, რომელმაც ემოციური სიტყვით მიაგო პატივი მამას. მან მადლობა გადაუხადა დედას და კორნელის ყოფილ მეუღლეს – სიუზან სილვერს, რომელიც ჯგუფის მენეჯერიც იყო.
Soundgarden-ის ცოცხალი წევრები – მეტ კამერონი, კიმ თაილი, ბენ შეპარდი და დამფუძნებელი ბასისტი ჰირო იამამოტო ერთად ესწრებოდნენ ცერემონიას. იამამოტომ, რომელიც ამ მოვლენისთვის კვლავ შეუერთდა ჯგუფს, ისაუბრა მეორე მსოფლიო ომის დროს მისი ოჯახის იძულებით გადასახლებაზე: „ამან ძალიან დიდი გავლენა მოახდინა ჩემს ცხოვრებაზე და დღესაც მწარედ მახსენებს თავს. ნუღარ დავამატებთ ისტორიას ასეთ ეპიზოდს,” – თქვა მან.
კიმ თაილმა კორნელის შემოქმედება გაიხსენა: „კრისი პირველი იყო, ვინც ახალ იდეაზე იტყოდა – მოდი, უბრალოდ ვცადოთ და ვნახოთ. ძალიან მენატრება. მიყვარს ის და მიყვარს ჩემი Soundgarden-ელი ძმები.“
საღამოს მუსიკალური ნაწილი მოიცავდა The Pretty Reckless-ის ვოკალისტის, ტეილორ მომსენისა და ბრენდი კარლაილის შესრულებებს. ცერემონია დასრულდა კრის კორნელის უმცროსი ქალიშვილის, ტონის გამოსვლით, რომელმაც ნენსი უილსონთან ერთად Fell on Black Days შეასრულა.
2025 წლის როკ-ენ-როლის დიდების დარბაზში ასევე შეიყვანეს OutKast, Bad Company, Cyndi Lauper, The White Stripes, ჩაბი ჩეკერი და ჯო კოკერი. ღონისძიება პირდაპირ გადაიცა Disney+-ზე და მისი ნახვა უკვე შესაძლებელია პლატფორმის სტრიმინგ სერვისით.
