12 ნოემბერს „თბილისის ბაროკო ფესტივალი” ისტორიული მნიშვნელობის კონცერტს უმასპინძლებს. ღონისძიება რუსთაველის თეატრის მცირე დარბაზში გაიმართება, სადაც მსოფლიოს ერთ-ერთი საუკეთესო ფორტეპიანოების მწარმოებელი პოლ მაკნალტი მოცარტის პიანოფორტეს ზუსტ ასლს წარადგენს.
მაკნალტის შექმნილი აქვს 300-ზე მეტი ფორტეპიანო ისტორიული ოსტატების: ზილბერმანის, შტაინის, ვალტერის, ჰოფმანის, გრაფისა და პლეიელის მოდელების მიხედვით. მის ინსტრუმენტებზე კი დღეს მსოფლიოს წამყვანი მუსიკოსები უკრავენ. მაკნალტის სახელოსნო ცნობილია ისტორიული ინსტრუმენტების ასლებითა და ინოვაციური რეკონსტრუქციებით, მათ შორისაა შოპენის ბუხჰოლცის ფორტეპიანოს (1825), პლეიელის (1830), ლისტის ბუასელოს (1846) და შტრაიხერის (1868) თანამედროვე რეპლიკები.
ისტორიული წყაროებით დასტურდება, რომ ბოლო ათი წლის განმავლობაში მოცარტი საფორტეპიანო კონცერტებს მხოლოდ ანტონ ვალტერის ინსტრუმენტზე ქმნიდა და ასრულებდა. ვალტერი კი იმ დროს ფორტეპიანოს ყველაზე სახელგანთქმულ ოსტატად მიიჩნეოდა.
სწორედ ვალტერის ფორტეპიანოს ასლი იქნება წარმოდგენილი 12 ნოემბრის კონცერტზე. ინსტრუმენტი შექმნილია პოლ მაკნალტის სახელოსნოში და ის „საქართველოს სინფონიეტამ” კულტურის სამინისტროს მხარდაჭერით შეიძინა. მასზე შესრულდება ფილიპ ემანუელ ბახის, მოცარტის, ჰაიდნისა და ბეთჰოვენის ნაწარმოებები. „საქართველოს სინფონიეტასთან” ერთად სცენაზე წარდგებიან ანა ქურდოვანიძე და ვივიანა სოფრონცკი.
„თბილისის ბაროკო ფესტივალის” მე-11 სეზონი 28 ოქტომბერს გაიხსნა. პირველი კონცერტს, სახელწოდებით „ქართული და ევროპული ძველი მუსიკა”, ჯანსუღ კახიძის ცენტრმა უმასპინძლა. სცენაზე წარდგნენ: ფოლკლორული ანსამბლი „შავნაბადა”, თბილისის ქალთა გუნდი, „საქართველოს სინფონიეტა”, ასევე მსოფლიოში აღიარებული კონტრტენორი ანდრეას შოლი და ცნობილი იტალიელი სოპრანო ჯულია ბოლკატო.
ფესტივალის ფარგლებში უკვე შედგა მეორე კონცერტიც, სადაც მსმენელის წინაშე ჰელსინკის ბაროკოს ორკესტრი იოჰან სებასტიან ბახის მუსიკით წარდგა.
ფესტივალის მომდევნო კონცერტები 18, 24, 27, 30 ნოემბერსა და 2 დეკემბერს რუსთაველის თეატრში გაიმართება. 7 დეკემბერს კი „თბილისი ბაროკო ფესტივალი” სახელმწიფო კონსერვატორიის დიდ დარბაზში დაიხურება.
ბილეთების შეძენა შესაძლებელია ბმულზე.
