ქეთი მელუა სოციალურ ქსელში დავით თორაძისადმი მიძღვნილი კონცერტის ვიდეოს აზიარებს. ქართველმა მომღერალმა სიმღერა „მოდი ჩემთან” ლეგენდარული კომპოზიტორის შვილთაშვილთან, ლეო ლოპეს დიასთან ერთად შეასრულა.
„ცოტა ხნის წინ ფლორენციას ვეწვიე დავით თორაძის შემოქმედების აღსანიშნავად, მისი ქალიშვილის, ნინო თორაძის თხოვნით. ეს იყო მიწვევა, რომელზეც უარს ვერ ვიტყოდი. დიდი სიამოვნება იყო, სცენაზე ჩემი საუკეთესო მეგობრის 11 წლის ვაჟთან ერთად მემღერა – ლეო ლოპეს დიასთან, რომელიც დავით თორაძის შვილთაშვილია. ჩვენ „მოდი ჩემთან” შევასრულეთ,” – წერს ქეთი მელუა ვიდეოს აღწერაში.
დავით თორაძისადმი მიძღვნილი კონცერტი ლექსო თორაძის ფონდის ორგანიზებით ფლორენციაში, ფრანკო ძეფირელის ფონდის დარბაზში შედგა. მსმენელის წინაშე დომენიკო სკარლატის ორკესტრი და ქართველი მუსიკოსები წარდგნენ, რომლებმაც დავით თორაძის ნაწარმოებები შეასრულეს.
