ჯოშ საფდის ახალ ფილმში Tyler, The Creator პირველ სრულმეტრაჟიან როლს ასრულებს. Marty Supreme-ში, რომლის ტრეილერიც 11 ნოემბერს გამოქვეყნდა, ასევე მონაწილეობენ ტიმოთე შალამე და გვინეტ პელტროუ.
ტიმოთე შალამე მარტი მაუსერის, ახალგაზრდა პინგ-პონგის მოთამაშის როლს ასრულებს, რომელიც ყველაფერს აკეთებს იმისათვის, რომ პროფესიონალურ სპორტში შევიდეს. სიუჟეტი ნაწილობრივ პინგ-პონგის მსოფლიო ჩემპიონ მარტი რეისმანის ცხოვრებაზეა დაფუძნებული.
Tyler, The Creator-ის პერსონაჟი, როგორც თრეილერიდან ვიგებთ, მარტის ახლო მეგობარია. გრემის მფლობელი რეპერი ფილმის თრეილერში რამდენჯერმე ჩნდება, ერთ-ერთ სცენაში ის სისხლიანი ცხვირით მარტის წინააღმდეგ პინგ-პონგის პარტიაში თამაშობს.
დინამიური თრეილერის ფინალში რეპერი მანქანიდან გადმოდის და გზის პირას მარტისთან ერთად ცეკვავს.
Marty Supreme-ის პრემიერა საშობაოდ გაიმართება. ამასთან, უკვე აქტიურად მიდის საუბარი ფილმის ოსკარზე წარდგენასთან დაკავშირებით. მსახიობთა გუნდის შემადგენლობაში არიან ასევე: პენ ჯილეტი, ოდესა აზიონი, კევინ ო’ლერი და აბელ ფერარა.
ოქტომბერში ჯოშ საფდიმ ნიუ-იორკის 63-ე კინოფესტივალზე ფილმი დაუგეგმავად აჩვენა, რასაც მაყურებლების ოვაციები და აპლოდისმენტები მოჰყვა. სწორედ მაშინ, Tyler, The Creator-იც ავიდა სცენაზე და პუბლიკას მიმართა. რეპერმა აღნიშნა, რომ რეჟისორის „უსაზღვრად მადლიერია“, რადგან ის იყო პირველი, ვინც მას, როგორც მსახიობს, ენდო.
„ჯოშ, მადლობა შენ! გთხოვთ, ოვაციები არ დაიშუროთ ამ ადამიანისთვის. იმდენად მადლიერი ვარ მისი, ამას სიტყვებით ვერ გადმოვცემ. მე უბრალოდ ფორტეპიანოზე ვუკრავ და კარგ ტანსაცმელს ვიცვამ, მსახიობობასთან კი საერთო არაფერი მაქვს.“ – თქვა სცენაზე Tyler, The Creator-მა.
შემდეგ კი განაგრძო: „ეს კაცი იმდენად გამორჩეულია, რომ მე მას სრულად ვენდე და ვუთხარი: „გავაკეთებ ყველაფერს, რაც დაგჭირდება, სცენარის წაკითხვაც კი არ მინდა, უბრალოდ მოვალ და იქ ვიქნები, ეს ყველაფერი იმიტომ ვთქვი, რომ ვენდობი ამ ადამიანს, და იმ გზას, რომელიც მან შექმნა და წარმართა. ეს მართლაც შესანიშნავი იყო, ემოციურად ავფორიაქდი, რადან შენ შანსი მომეცი, ამიტომ, კიდევ ერთხელ მადლობას გიხდი, მიყვარხარ და გთხოვთ ტაში დაუკარით.”
ნახეთ ფილმ Marty Supreme-ის თრეილერი:
