Charli xcx კიდევ ერთი სიმღერით დაბრუნდა, რომელიც „ქარიშხლიანი უღელტეხილის” ემერალდ ფენელისეული ადაპტაციისთვის შექმნა. ფილმის ტრეილერი 13 ნოემბერს გამოქვეყნდა, რომელშიც პოპვარსკვლავის ახალი სიმღერა Chains of Love ჟღერს.
ტრეილერი იწყება ემილი ბრონტეს რომანის ცნობილი გმირების, ჰითკლიფისა და კეთრინის საუბრით, რომელთაც ჯეიკობ ელორდი და მარგო რობი ასახიერებენ. კეთრინის კითხვის შემდეგ ჰითკლიფი წარმოიდგენს, თუ რას გააკეთებდა, მდიდარი რომ იყოს. კეთრინი კი შეკრთება მის პასუხზე, რომ ცოლს მოიყვანდა. ამის შემდეგ კადრები უკვე წყვილის ტრაგიკული სიყვარულის ისტორიაზე გადადის.
Charli xcx-ის სრული სიმღერა ტრეილერის გამოქვეყნების დროს გამოვიდა და ხელმისაწვდომია სტრიმინგ პლატფორმებზე. ის მოჰყვება სიმღერას House, რომელიც მუსიკოსმა ჯონ კეილთან თანამშრომლობით ასევე „ქარიშხლიანი უღელტეხილის” ალბომისთვის შექმნა. ალბომის გამოსვლა 13 თებერვალს, ფილმის კინოთეატრებში გამოსვლამდე ერთი დღით ადრე იგეგმება.
ცოტა ხნის წინ ჩარლიმ ისაუბრა, თუ როგორ დაიბადა ახალი ალბომის კონცეფცია: „ემერალდს დავურეკე და ვკითხე, რას ელოდებოდა ჩემგან სცენარის წაკითხვის შემდეგ. მან კითხვითვე მიპასუხა: ‘სიმღერას?’ მე კი ვუთხარი: ‘ალბომს?’. რატომაც არა? მე მინდოდა იმ სამყაროში შეცურვა, რომელიც ძალიან უხეში, ველური, სექსუალური, გოთიკური, ბრიტანული, წამებითა და ნამდვილი წინადადებებით სავსე იქნებოდა, თავისი პუნქტუაციითა და გრამატიკით.”
„სიმღერების ეს კოლექცია ალბომს წარმოადგენს და, ცხადია, მის კრედიტებში ჩემი სახელია, მაგრამ არის ეს Charli xcx-ის ალბომი? არც კი ვიცი და არც მაინტერესებს ამის გარკვევა.”
ნახეთ „ქარიშხლიანი უღელტეხილის” ტრეილერი და მოუსმინეთ Chains of Love-ს:
