ქართულმა ბენდმა Quemmekh-მა ბრიტანულ ლეიბლთან და მუსიკის დისტრიბუციის კომპანიასთან Revolver Music (Heavy Metal) კონტრაქტი გააფორმა. ეს იშვიათი შემთხვევაა, რამდენადაც ქართულ ალტერნატიულ ბენდებს ავტორიტეტულ დასავლურ ლეიბლებზე თითქმის არასდროს ვხვდებით.
Revolver Music 1979 წელს დიდ ბრიტანეთში დაარსდა და არაერთი დამოუკიდებელი ბენდისთვის გახდა საერთაშორისო აღიარების საწყისი. მის კატალოგში ვხვდებით არტისტებს, რომელთა ჟანრობრივი მიმართულება როკი, პანკი და მეტალია.
Revolver Music-თან თანამშრომლობის ფარგლებში Quemmekh მალე ახალ ალბომსაც გამოუშვებს.
ამ კონტრაქტისა და ბენდის სიახლეების შესახებ Billboard Georgia ბენდის ფრონტმენს, სანდრო ქერაულს ესაუბრა:
„კონტრაქტი ჩვენი სივრცის გაფართოებისა და ზრდის ახალი ეტაპია. თუ აქამდე ყველაფერი ადგილობრივ მასშტაბში, ჩვენი რესურსებით ხდებოდა, ახლა უკვე ჩნდება საერთაშორისო პლატფორმა, რომელიც Quemmekh-ს ახალ საფეხურზე გადაიყვანს და გლობალურ აუდიტორიამდე მისვლის რეალურ შესაძლებლობას შეუქმნის. ეს თანამშრომლობა არ ცვლის Quemmekh-ის სულიერ ბირთვს, პირიქით, ის, ამ ღირებულებათა შენარჩუნებით, გვიხსნის თვითგამოხატვის სრულიად ახალ გზებს,” – ამბობს სანდრო ქერაული.
ფოტო: ნინუცა კაკაბაძე/Billboard Georgia
კონტრაქტით ლეიბლი პასუხისმგებლობას იღებს გავრცელებაზე, პრომო აქტივობებზე და საერთაშორისო კონტაქტებზე. ევროპულ დისტრიბუციასთან ერთად იგეგმება საერთაშორისო კოლაბორაციები, რაც ბენდის მუსიკას კიდევ უფრო მასშტაბურ აუდიტორიას გააცნობს. ამგვარად, Quemmekh ლოკალურ სტატუსს ტოვებს და ახალ სივრცეში გადადის.
სანდრო ქერაული:
„ლეიბლი გადამწყვეტი საყრდენია ყველა არტისტისთვის. ახალ ეტაპზე გადასვლისას რისკი ყოველთვის არსებობს, მაგრამ ასეთ დროს შუა გზაზე პარაშუტი გეძლევა და თუ სწორად მოიქცევი, შეიძლება გადარჩე კიდეც. ამ ახალ ეტაპზე მუსიკა, ვიდეოები, ვიზუალური ნარატივი – ყველაფერი შენი ყოველდღიურობა ხდება და პროდუქტის ხარისხი და ავთენტურობაც თავისთავად იზრდება. ჩვენი მიზანი უბრალოდ პოპულარობა არ არის, არამედ ახალი კულტურული არქეტიპის შექმნაა – ისეთის, რომელიც აღმოსავლეთ ევროპის შინაგან მღელვარებას დასავლური ინდუსტრიის ჩარჩოებში შეიყვანს და ამავდროულად, ფორმასაც შეინარჩუნებს. ახლა ყველაზე მნიშვნელოვანი მუსიკაა და ამ ეტაპზე არაფერი მაინტერესებს ისე, როგორც ამ ახალი ალბომის ენერგიის აღმოჩენა.”
Revolver Music-თან კონტრაქტის გაფორმება Quemmekh-ისთვის ერთდროულად სტრატეგიული და სიმბოლური ნაბიჯია:
„პირველად ჩნდება განცდა, რომ ქართული მძიმე სცენა აღარ არის მხოლოდ შიდა კულტურული გეტო, არამედ ცოცხალი ქსელი, რომელსაც შეუძლია იმოქმედოს დასავლურ პლატფორმებზე საკუთარი წესებით,” – ამბობს სანდრო ქერაული.
