მერაია კერის ჰიტი – All I Want for Christmas Is You Billboard Hot 100-ის ჩარტში უკვე დაწინაურდა. როგორც ცნობილია, სიმღერა 15 ნოემბრის თარიღით შედგენილ სიაში 31-ე ადგილს იკავებს.
Luminate-ის უახლესი სტატისტიკის მიხედვით, 31 ოქტომბერიდან 6 ნოემბრამდე კომპოზიციას ჰქონდა: 9.9 მილიონი ოფიციალური სტრიმი; 942 000 რადიო აუდიტორიის ჩართულობა და 1 000 გაყიდვა აშშ-ში.
შედარებისთვის, გასული წლის იმავე პერიოდის (1-7 ნოემბერი, 2024) შედეგები ასეთია: 10.4 მილიონი სტრიმი; 1.7 მილიონი რადიო-აუდიტორია და 1 000 გაყიდვა. მანამდე, ერთი წლით ადრე (3-9 ნოემბერი, 2023) მონაცემები ასეთი იყო: 10.8 მილიონი სტრიმი, 1.8 მილიონი რადიო-აუდიტორია და 1 000 გაყიდვა.
Billboard-ის ანალიტიკოსები აღნიშნავენ, რომ სიმღერის ჩარტში ადრე დაბრუნებას ხელს უწყობს რამდენიმე ფაქტორი, მათ შორის: შემცირებული სტრიმინგი მიმდინარე ჰიტებს შორის და Hot 100-ის ახალი წესები, რომლებიც ჩარტში ხანგრძლივად მყოფ სინგლებს მოწინავე პოზიციებიდან ხსნის, რითაც მეტი სივრცე იქმნება სეზონური ჰიტებისთვის. ეს დინამიკა განსაკუთრებით თვალსაჩინოა მას შემდეგ, რაც მაიკლ ჯექსონის Thriller ჰელოუინის პერიოდში კვლავ ათეულში დაბრუნდა.
All I Want for Christmas Is You პირველად 1994 წელს გამოვიდა, ხოლო Hot 100-ის ტოპ 10-ში 2017 წლის დეკემბერში მოხვდა. 2019 წლის დეკემბერში სიმღერამ საბოლოოდ დაიკავა პირველი პოზიცია. მას შემდეგ სინგლი ყოველი სადღესასწაულო სეზონის ლიდერია. მის ანგარიშზე ლიდერობის 18 კვირაა, რაც Hot 100-ის ისტორიაში პირველი ადგილის ფლობის მესამე ყველაზე ხანგრძლივი შემთხვევაა.
სიმღერა საშობაო ჩარტის ლიდერ პოზიციასაც იკავებს.
