მიუხედავად იმისა, რომ სეზონის გამო ტემპერატურა დღითიდღე იკლებს, მუსიკალურ სივრცეში ციებ-ცხელება მატულობს. კვირის განმავლობაში მუსიკალური კომპოზიციები Summer Walker-მა, მაილი საირუსმა და სხვა არტისტებმაც წარადგინეს.
ამ კვირას R&B-ის არტისტმა Summer Walker-მა საბოლოოდ გამოაქვეყნა დიდი ხნის ნანატრი ალბომი Finally Over It, რომელიც მისი Over It ალბომების სერიის მესამე ნაწილია.
დინამიკური კოლაბორაციების მეშვეობით, კრის ბრაუნიდან დაწყებული ბრაისონ ტილერით, 21 Savage-ით, Sailorr-ით, ბრენტ ფაიაზითა და Doja Cat-ით დამთავრებული, Summer Walker საკუთარ შეხედულებებს სიყვარულზე ორ ნაწილად ყოფს. ალბომი ორ დისკად არის გამოცემული: For Better და For Worse, სადაც თითოეულს თავისი განწყობა და მიმართულება აქვს.
ნოემბრის შუა პერიოდში ასევე არაერთი ახალი პროექტი გამოვიდა. მათ შორისაა Mount Pleasant – კელსია ბალერინის ექვსი კომპოზიციისგან შემდგარი მინი ალბომი, რომელიც შინაგან განცდებს და თვითშემეცნების პროცესებს ასახავს, ასევე ლუის კაპალდის EP, სახელწოდებით Survive, რომელიც მას შემდეგ გამოვიდა, რაც ბრიტანელმა ჰიტების შემქმნელმა ფსიქიკური ჯანმრთელობის გამო მუსიკალური პაუზა აიღო. გარდა ამისა, ჯესი მერფმა Billboard 200-ის ტოპ ათეულში შესული ალბომის, Sex Hysteria-ს დელუქს ვერსია წარადგინა, რომელშიც რვა ახალი კომპოზიციაა შესული.
რაც შეეხება ამ კვირის სინგლებს, მაილი საირუსმა და დომინიკ ფაიკმა ახალი კომპოზიციები წარადგინეს. მაილი საირუსმა სიმღერა – Dream as One 2018 წელს კალიფორნიის ხანძრების შედეგად სახლის დაკარგვის გამოცდილების შთაგონებით შექმნა, რომელიც Avatar: Fire and Ash-ის გამოსვლისთვის სპეციალურად დაიწერა. დომინიკ ფაიკმა კი სიმღერა White Keys გამოსცა, რომელიც აქამდე ოფიციალურად არ გამოქვეყნებულა, თუმცა გულშემატკივრების საყვარელი ტრეკი იყო. სიმღერა არტისტმა პირველად Camp Flog Gnaw-ს ფესტივალზე Tyler, the Creator-ის გამოსვლამდე შეასრულა.
