მრავალფეროვანი მუსიკალური გამოცდილება, შემოქმედებითი შეხვედრები, პოლიფონია და სხვადასხვა კულტურული აქტივობები „გიორგობის თვის” ფესტივალზე ერთ სივრცეში მოიყრის თავს, რათა ნოემბრის ბოლო შაბათ-კვირას დამსწრე საზოგადოება განსაკუთრებული ემოციითა და შთაბეჭდილებებით აავსოს.
ორდღიანი ფესტივალის პირველ დღეს, 29 ნოემბერს, მსმენელის წინაშე ადილეი, მთვარის კლუბი, ონისე, Jam Session Georgia და Tamada წარდგებიან, მეორე დღეს, 30 ნოემბერს კი Little Rocks, Stress, წერილი, Psychonaut 4, Skazz და Outsider გამოვლენ.
მუსიკის გარდა, ფესტივალზე სხვადასხვა კულტურული აქტივობაც იგეგმება, – ცოცხალი მუსიკისა და ტრადიციული პოლიფონიის პარალელურად გაიმართება ლიტერატურული შეხვედრა-პრეზენტაციები, მხატვრული ნამუშევრების გამოფენები და მასტერკლასები, ასევე სტუმრებს შეეძლებათ ქართული მარნების საუკეთესო საკოლექციო ღვინის და ქართული, ავთენტური სამზარეულოს დაგემოვნებაც.
ქართული კულტურის ფესტივალის ორგანიზატორები საქართველოს მუსიკოსთა პროფესიული კავშირი, ნატურალური ღვინის ფესტივალი – Supernatural და საქართველოს წიგნის ასოციაცია არიან.
„გიორგობის თვე“ არის ღონისძიება, რომელიც შემოდგომის ბოლო დღეებს განსაკუთრებულ კულტურულ პლატფორმად აქცევს. ორი დღის განმავლობაში Elektrowerk-ის ღია სივრცეში ტრადიციული და თანამედროვე კულტურის სინთეზი ერთიანი პროგრამით იქნება წარმოდგენილი და სტუმრებს მრავალფეროვან მუსიკალურ და შემოქმედებით გამოცდილებას შესთავაზებს.
ფესტივალზე დასასწრები ბილეთების შეძენა შესაძლებელია Biletebi.ge-ს ბმულზე.
