Iggy Azalea ოფიციალურად ემშვიდობება რეპკარიერას. ავსტრალიაში დაბადებულმა არტისტმა, რომელიც ბოლო დროს სამეწარმეო და ციფრულ ბიზნესზეა გადართული, დაადასტურა, რომ მუსიკალურ ინსდუსტრიაში დაბრუნებას არ გეგმავს.
აღნიშნული ინფორმაცია ინსტაგრამის პოსტს მოჰყვა, სადაც აზალიამ სელფი გამოაქვეყნა. ერთ-ერთმა ფანმა კი ჰკითხა, ახალ კონტრაქტს ხომ არ აფორმებდა ხმისჩამწერ სტუდიასთან.
„ჯანდაბა, არა,” – უპასუხა კომენტარებში მუსიკოსმა. „თუმცა ამაზე რამდენიმე კვირის განმავლობაში ვფიქრობდი. დარწმუნებული ვარ, რომ მუსიკალურ ინდუსტრიაში დაბრუნება არ მინდა.”
რეპერი უკვე წლებია, მუსიკალურ კარიერას ჩამოშორდა. ბოლო სტუდიური ალბომი The End of an Era 2021 წელს გამოსცა, როგორც მისი ცხოვრების შემოქმედებითი ეტაპის დასასრული. აზალიას დებიუტი 2014 წელს შედგა ალბომით The New Classic. ალბომს დიდი წარმატება ხვდა წილად, მისი სინგლი Fancy კი Billboard Hot 100-ის ლიდერი გახდა. აზალია დეკადის ერთ-ერთ ყველაზე კომერციულად წარმატებულ ავსტრალიელ რეპერად იქცა.
წლის დასაწყისში მუსიკოსმა X-ზე დაწერა, რომ Universal Music Group-ს მისთვის გადასახდელი „მილიონობით დოლარის” ოდენობის საერთაშორისო როიალტი მართებდა. ის ამტკიცებდა, რომ საუბარი რვანიშნა ციფრებს ეხებოდა და ამბობდა, რომ კარიერის ადრეულ ეტაპზე კორპორაციამ ანაზღაურება „ტექტნიკურად მოპარა”. Universal Music Group-ს ბრალდებაზე კომენტარი არ გაუკეთებია, აზალიამ კი საკითხის განხილვა და არტისტების უფლებებისა და როიალტის გამჭვირვალობისთვის ბრძოლა განაგრძო.
აგვისტოში რეპერი ABC News-ზე გამოჩნდა, სადაც გულახდილად ისაუბრა იმ წნეხზე, რომელიც ცნობადობის ზენიტში გამოსცადა. მან გაიხსენა, რომ კარიერის დასაწყისში მას „ინდუსტრიის მცენარე” შეარქვეს და რეპინდუსტრია „ბრძოლის ველად” მოიხსენია. „მუდმივად ნაღმებზე დავდიოდი და ამას უბრალოდ ვერ გავუძლებდი. ეს არ არის გაძლებადი,” – თქვა მან და დაამატა, რომ მიუხედავად იმისა, რომ გზაზე ბევრ შეცდომას უშვებდა, მუსიკისადმი მისი დამოკიდებულება ყურადღების ცენტრში ყოფნის ემოციურმა წნეხმა შეცვალა.
„არის რაღაცები, რაც დავიმსახურე, ან რაღაცები, რაც უკეთ შემეძლო გამეკეთებინა. მაგრამ ვერ ვიჯდები ამის გამო მთელი დღე და ვერ ვინერვიულებ. ეს უბრალოდ ცხოვრების ნაწილია.”
ამჟამად აზალია ბიზნესსაქმიანობაზეა გადართული, რაც მოიცავს კრიპტოვალუტის პროექტებსა და ონლაინ შემოქმედებით სფეროს. და როგორც მისი ბოლო კომენტარი მიანიშნებს, მუსიკალური ინდუსტრიიდან წასვლის გადაწყვეტილება მყარია და დარბუნების გეგმები ჯერჯერობით ჰორიზონტზეც არ ჩანს.
