1-ელ დეკემბერს რიანა და A$AP Rocky Gotham-ის 2025 წლის დაჯილდოებაზე ერთად გამოჩნდნენ. წყვილმა წითელ ხალიჩაზე მათ ურთიერთობასა და მზარდ ოჯახზე გულახდილად ისაუბრა. ორ თვეზე ცოტა მეტია, რიანა და A$AP Rocky მესამე შვილის მშობლები გახდნენ. წყვილს პირველი ქალიშვილი შეეძინა.
რიანამ Extra TV-ისთან საუბარში აღნიშნა, რომ ძალიან ამაყობს თავისი პარტნიორის სამსახიობო სფეროში მიღწეული წარმატებით. რეპერი დაჯილდოების ნომინანტთა შორის ფილმ Highest 2 Lowest-ში შესრულებული როლისთვის მოხვდა, თუმცა პრიზი საბოლოოდ Souleymane’s Story-ის მსახიობმა აბუ სანგარემ მიიღო.
„ყოველ ჯერზე, როცა მას ფილმში ვხედავ, გაოცებას ვერ ვმალავ. მიკვირს, რადგან არ ვიცოდი, თუ ეს ნიჭი მასში იყო, მაგრამ ის ასეთი დიდი ტალანტია,” – უთხრა რიანამ ჟურნალისტს.
რაც შეეხება მის სამ შვილს, მომღერალმა თქვა, რომ ისინი თავს არაჩვეულებრივად გრძნობენ. სექტემბერში რიანას და A$AP Rocky-ს ქალიშვილი შეეძინათ, რომელსაც როკი დაარქვეს. წყვილის უფროსი ვაჟი RZA 3 წლისაა, ხოლო Riot Rose – 2 წლის. „ისინი სულ უფრო იზრდებიან და მათი გარეგნობა იცვლება,“ – თქვა რიანამ.
წითელ ხალიჩაზე რიანამ Balenciaga-ს ვარდისფერი კაბა და ბუმბულიანი ქუდი მოირგო, როკი კი Chanel-ის კლასიკურ შავ კოსტუმსა და ზოლებიან ჰალსტუხში იყო გამოწყობილი. რეპერმა E! News-ს უთხრა, რომ მისი ცხოვრება პარტნიორთან და შვილებთან ერთად „ოცნებაა, რომელიც ახდა“.
„ყოველი დღე პაემანია… ეს შესანიშნავია. მოუთმენლად ველი თეთრ შობას თოვლით და მოხალული თხილით. შეშას ბუხარში – მსგავს რაღაცებს“.
რიანას და როკის ახალ წელს ნამდვილად ბევრი რამ აქვთ აღსანიშნი. გარდა იმისა, რომ როკის სამსახიობო პროექტები წარმატებული აღმოჩნდა, ის 2025 წლის მაისში Met Gala-ს თანაორგანიზატორიც იყო. რიანა კი „სმურფების“ ფილმში გამოჩნდა. Gotham Awards-ის დღეს რიანამ ასევე შეიტყო, რომ მისმა 2016 წლის ალბომმა – Anti-მ Billboard 200-ის ჩარტში 500 კვირა გაატარა.
„ღმერთს არ დავვიწყებივარ!“ – დაწერა მან X-ზე ამ რეკორდული შედეგის შესახებ, რომელიც შავკანიანი სოლო შემსრულებელი ქალის ალბომისთვის ჩარტში ყოფნის ყველაზე ხანგრძლივ პერიოდს წარმოადგენს.
