2026 წლის „ფიფას” მსოფლიო ჩემპიონატისკენ მიმავალი გზა კიდევ უფრო ვარსკვლავურია. 5 დეკემბერს ტურნირის წილისყრას „ტონის” მფლობელი მსახიობი და მომღერალი ნიკოლ შერზინგერი, გრემიზე ნომინირებული ანდრეა ბოჩელი, სუპერვარსკვლავი რობი უილიამსი და დისკოს საკულტო ჯგუფი Village People გახსნიან. ღონისძიება ვაშინგტონში, კენედის ცენტრში გაიმართება. მისი წამყვანები კი ჰეიდი კლუმი, კევინ ჰარტი და დენი რამირეზი იქნებიან.
წილისყრაზე გამოსვლა წარმატებული წლის დასასრული იქნება შერზინგერისთვის. ზაფხულში მან „ტონის” ჯილდო მოიგო მთავარი როლის საუკეთესო შესრულებისთვის ბროდვეის მიუზიკლში Sunset Boulevard.
მსოფლიო ჩემპიონატის ღონისძიებები უცხო არ არის ანდრეა ბოჩელისთვის. სწორედ ის იყო 2010 წლის მსოფლიო თასის ფინალამდე რამდენიმე დღით ადრე გამართული კონცერტის, Celebrate Africa-ს ჰედლაინერი.
ოსკარზე ნომინირებული ბიოგრაფიული ფილმის, Better Man-ის წარმატების შემდეგ, უილიამსის წილისყრის კონცერტში მონაწილეობა რამდენიმე თვით უსწრებს წინ მისი მე-13 სტუდიური ალბომის, Britpop-ის გამოსვლას თებერვალში.
ხოლო რაც შეეხება Village People-ს, ისინი 2025-ს იმ ქალაქში დახურავენ, სადაც წელს უკვე რამდენიმე ღონისძიებაზე დაუკრეს, მათ შორის იყო პრეზიდენტ ტრამპის მეორე ინაუგურაცია.
ვარსკვლავური შესრულებების გარდა, წილისყრა გამოავლენს ჯგუფური ეტაპის წყვილებს „ფიფას” პირველ 48-გუნდიან ჩემპიონატზე, რომელიც მომავალი წლის 11 ივნისს აიღებს სტარტს და 19 ივლისამდე გაგრძელდება. ტურნირს პირველად შეუერთდება სამი ქვეყანა: აშშ, როგორც მასპინძელი და კანადა და მექსიკა, როგორც თანამასპინძელი ქვეყნები. წილისყრის წამყვანი ინგლისის ნაკრების ყოფილი კაპიტანი რიო ფერდინანდი იქნება სპორტულ ჟურნალისტ სამანთა ჯონსთან ერთად.
ჯგუფური ეტაპის წყვილების გამოვლენაში მათ სპორტის რამდენიმე საკულტო ფიგურა დაეხმარება. ესენი არიან: NFL-ის ვარსკვლავი ტომ ბრედი, NBA-ის ლეგენდა შაკილ ო’ნილი, ჰოკეის ყველა დროის უდიდესი სპორტსმენი უეინ გრეტზკი და New York Yankees-ს მოთამაშე აარონ ჯაჯი. წითელი ხალიჩის წამყვანი კი ამერიკის კიდევ ერთი საფეხბურთო ვარსკვლავი, ორგზის Super Bowl-ის ჩემპიონი ელი მენინგი იქნება.
