საბრინა კარპენტერისა და მისი ფანების მძაფრი კრიტიკის შემდეგ თეთრმა სახლმა წაშალა ვიდეო, რომელშიც გამოყენებული იყო მომღერლის სიმღერა – Juno. ვიდეო აშშ-ის ემიგრაციისა და საბაჟო აღსრულების სამსახურის (ICE) ვიდეოში გამოიყენეს.
პოსტი სწრაფად გავრცელდა, მაგრამ არა იმ მიზეზით, რაც ადმინისტრაციას ამოძრავებდა. შეერთებული შტატების ემიგრაციისა და საბაჟო აღსრულების ოფიცრების კოლაჟში, სადაც ჩანდა, როგორ მისდევდნენ და ხელბორკილებს ადებდნენ ადამიანებს ქუჩებში, ფონად Short n’ Sweet-ის ჰიტი Juno ჟღერდა. „ეს ვიდეო ბოროტი და ამაზრზენია,”– დაწერა კარპენტერმა X-ზე. „არასოდეს გამოიყენოთ ჩემი მუსიკა თქვენი არაადამიანური დღის წესრიგის სასარგებლოდ.”
კარპენტერის მიერ გამოთქმული პროტესტის შემდეგ, Newsweek-თან გაზიარებულ პასუხში, თეთრი სახლის სპიკერმა აბიგეილ ჯექსონმა თქვა: „ჩვენ ბოდიშს არ მოვიხდით ჩვენი ქვეყნიდან სახიფათო კრიმინალების – მკვლელების, მოძალადეებისა და პედოფილების დეპორტაციისთვის.”
ამ დრომდე თეთრ სახლს არ გამოუქვეყნებია ახსნა-განმარტება ვიდეოს წაშლის შესახებ, ხოლო კარპენტერის წარმომადგენლებს დამატებითი კომენტარი არ გაუკეთებიათ.
კარპენტერისათვის 2025 წელი წარმატებული იყო. მის ანგარიშზე მრავალი Hot 100 ჰიტი და საკონცერტო ტურნეს ხალხმრავალი შოუებია. Juno კი მის ერთ-ერთ ყველაზე თვალსაჩინო ჰიტად რჩება.
ბოლო დროს აშშ-ის სამთავრობო ოფიციალური არხები პოპ-ჰიტებს პოლიტიკურ მესიჯებს უხამებდნენ. ეს არის ტაქტიკა, რომელმაც უკვე გამოიწვია უკმაყოფილება ისეთი არტისტებისგან, როგორიცაა მაგალითად ოლივია როდრიგო, რომელმაც გასულ თვეში დაგმო თეთრი სახლი მისი სიმღერის, All-American Bitch-ის გამოყენების გამო. „არასოდეს გამოიყენოთ ჩემი სიმღერები თქვენი რასისტული, სიძულვილით სავსე პროპაგანდის ხელშესაწყობად“, – დაწერა მან.
კარპენტერის Juno-ს გამოყენება განსაკუთრებით ხმაურიანი აღმოჩნდა იმის გათვალისწინებით, რომ ეს სიმღერა არტისტის Short ’n Sweet ტურზე ფანების ფავორიტი იყო. Juno-ს შესრულებამდე მომღერალი ადამიანებს ხუმრობით ადებდა ბორკილებს იმის გამო, რომ ისინი ზედმეტად მიმზიდველად გამოიყურებოდნენ.
