Lizzo სასამართლოში მოგებულ საქმეს აღნიშნავს: 2023 წელს სამი ყოფილი მოცეკვავის – არიანა დევისის, ნოელე როდრიგესისა და კრისტალ უილიამსის მიერ შეტანილ რეზონანსულ სარჩელში გაჟღერებული ე.წ. fat-shaming-ის, იგივე წონასთან დაკავშირებული დისკრიმინაციის ბრალდებები უმაღლესი სასამართლოს მოსამართლემ უსაფუძვლოდ გამოაცხადა, ხოლო ბრალმდებლებმა სააპელაციო საჩივრის გაგრძელებაზეც თქვეს უარი.
Lizzo-მ 15 დეკემბერს, TikTok-სა და Instagram-ზე ვიდეო გამოაქვეყნა, რომელშიც ტექსტის სახით მისი განცხადებაა წარმოდგენილი – ის ეხმიანება ფაქტს, რომ მის წინააღმდეგ გაჟღერებული „fat-shaming“-ის ბრალდებები ოფიციალურად გაბათილდა.
„ჩემ წინააღმდეგ წაყენებული სხეულის შერცხვენის ბრალდებები თავად მათ უარყვეს, ვინც ბრალს მდებდა. მათ სასამართლოში აღიარეს, რომ ამ ბრალდებებს არ ჰქონდა არანაირი სამართლებრივი საფუძველი. არ არსებობს მტკიცებულება, რომ ვინმე წონაში მომატების გამო სამსახურიდან გავათავისუფლე, რადგან ეს უბრალოდ არ მომხდარა. საბოლოოდ, სიმართლე გამოაშკარავდა.“
Lizzo-ს თქმით, მოცეკვავეთა გათავისუფლების რეალური მიზეზი საიდუმლო ჩანაწერი გახდა და არა მათი წონის ცვლილება. მისი განმარტებით, პირადი საუბარი, რომელიც მისი თანხმობის გარეშე ჩაიწერეს, მოგვიანებით სხვა ყოფილ თანამშრომელს გადაუგზავნეს.
2024 წლის თებერვალში მოსამართლე ეპსტეინმა დაადგინა, რომ „fat-shaming“-ის ბრალდებები შეერთებული შტატების კონსტიტუციის პირველი შესწორებით დაცულ უფლებებს ეწინააღმდეგებოდა. საქმეში ასევე არსებობდა მტკიცებუკებები, რომლებიც ადასტურებდა, რომ მოცეკვავეები პირადი შეხვედრის დროს ფარულად გაკეთებული ჩაწერის გამო გაათავისუფლეს. მიუხედავად იმისა, რომ მოცეკვავეებმა თავდაპირველად გადაწყვეტილება გაასაჩივრეს, ნოემბერში მათ აპელაციაზე უარი განაცხადეს.
„არასდროს გამითავისუფლებია ვინმე წონის გამო. პირიქით – ყოველთვის მხარს ვუჭერდი და ვაძლიერებდი სხვადასხვა გარეგნობის მქონე ადამიანებს და ჩემს პლატფორმას მათთვის ვაზიარებდი,” – ამბობს Lizzo.
არტისტის განცხადებით, ეს ბრალდება მისთვის ემოცოურად უკიდურესად დამანგრეველი იყო. „პროცესს ჩემი იურისტები უძღვებოდნენ და ამ გამარჯვებისთვის უსაზღვროდ მადლიერი ვარ. სამართლებრივი ბრძოლა ჯერ არ დასრულებულა. კომპრომისზე არ მივდივარ. თითოეულ ბრალდებას ბოლომდე შევებრძოლები, სანამ სიმართლე სრულად არ გამოაშკარავდება.“
მიუხედავად იმისა, რომ „fat-shaming“-ის ბრალდებები მოიხსნა, საქმე Lizzo-სა და მისი ფროდაქშენ-კომპანიის წინააღმდეგ კვლავ გაგრძელდება. სამი ბრალმდებელი ამტკიცებს, რომ არტისტი მათ სექსუალურად ავიწროვებდა და ტოქსიკურ სამუშაო გარემოს უქმნიდა.
Lizzo-ს გუნდმა ბრალდება უარყო და მას გამოგონილი ისტორია უწოდა, თუმცა ლოს-ანჯელესის მოსამართლემ 2024 წლის დასაწყისში საქმის გაგრძელების ნებართვაზე თანხმობა განაცხადა.
დეკემბრის დასაწყისში ყოფილმა მოცეკვავეებმა სასამართლოს მიმართეს თხოვნით, სექსუალური შევიწროების საქმე სასამართლო განხილვამდე მისულიყო.
„როგორც ორი წლის წინ, ახლაც, მოცეკვავეებმა ვერ დაასახელეს ერთი ადამიანიც კი, ვინც მათ უსაფუძვლო ბრალდებებს დაადასტურებდა,“ – განაცხადა არტისტის ადვოკატმა, მელისა გლასმა Billboard-თან 11 დეკემბერს გაზიარებულ კომენტარში. „ამის საპირისპიროდ, Lizzo-ს ტურნეზე მომუშავე თვრამეტმა მოწმემ ფიცით დამოწმებული ჩვენებები წარადგინა, რომლებიც დევისის, უილიამსისა და როდრიგესის განცხადებებს უარყოფს. ველით სააპელაციო სასამართლოს გადაწყვეტილებას.“
Lizzo-მ კატეგორიულად უარყო გახმაურებულ სარჩელში წარმოდგენილი სკანდალური ბრალდებები. „მე არ შევეგუები და ვერ დავუშვებ, რომ ადამიანებმა ჩემი გახსნილობა გამოიყენონ და ისეთად წარმომაჩინონ, როგორიც არ ვარ,“ – განაცხადა ვარსკვლავმა.
იხილეთ Lizzo-ს განცხადება:
