ყველამ იცის, რომ დონა სამერს გასაოცარი ხმა ჰქონდა, მაგრამ ნაკლებად ცნობილია ის ფაქტი, რომ ის თავადვე იყო საკუთარი ჰიტების ავტორი ან თანაავტორი. 15 დეკემბერს სამერმა, როგორც იქნა, ამ მხრივაც მიიღო სათანადო აღიარება და გარდაცვალების შემდეგ კომპოზიტორების დიდების დარბაზში შევიდა.
გავრცელებულ განცხადებაში სამერის ქვრივი ბრიუს სუდანო ამბობს: „ეს ძალიან მნიშვნელოვანია ჩემთვის, რადგან ვიცი, რამდენად მნიშვნელოვანი იყო დონასთვის. იმ ბევრ ტიტულთან ერთად, რაც კარიერის განმავლობაში მიუღია, მისი კომპოზიტორის რანგში აღიარება იყო ის, რაზეც მუდმივად ჰქონდა განცდა, რომ უგულებელყოფილი იყო. ამიტომ ახლა, როცა ის კომპოზიტორების დიდების დარბაზში შეიყვანეს, ვიცი, რომ ძალიან ბედნიერია… იქ, სადღაც.”
სამერი არის ავტორი ან თანაავტორი მისი 14-დან 9 ჰიტისა, რომელიც Billboard Hot 100-შია შესული. ისაა ერთადერთი ავტორი სიმღერისა Dim All the Lights და თანაავტორი დანარჩენი რვა ჰიტის: Love to Love You Baby, I Feel Love, Heaven Knows, Bad Girls, On the Radio, The Wanderer, She Works Hard for the Money და This Time I Know It’s for Real.
Hot 100-ში შესული ჯამში 32 სიმღერიდან, 18 სამერის ავტორობით ან თანაავტორობითაა შექმნილი. „ბილბორდი” გამოკითხვას ატარებს, თუ რომელი მათგანია მსმენელის ფავორიტი. შეგიძლიათ ხმა მისცეთ ბმულზე.
