ყოველწლიური საქველმოქმედო კონცერტის, House Full of Toys-ის 26-ე გამოშვებისთვის სტივი უანდერმა ვიდეო გაავრცელა, რომელშიც ამბობდა, რომ ამჯერად ის ღონისძიების ფორმატს ცვლიდა და ერთი საღამოს ნაცვლად, 25 გრემის მფლობელი ლეგენდა ოთხ კონცერტს გამართავდა – 18, 19, 20 და 21 დეკემბერს. თუმცა, სამწუხაროდ, გეგმები შეიცვალა და დროის სიმცირის გამო უანდერმა კონცერტები საერთოდ გააუქმა. მისი თქმით, ღონისძიება მომავალ წელს დაბრუნდება.
განცხადებაში, რომელიც რადიოეთერით თავადვე წაიკითხა, მუსიკოსი აღნიშნავს: „კვირა-ნახევრის წინ მომივიდა იდეა, რომ, ერთის ნაცვლად, House Full of Toys-ის ოთხი კონცერტი გამემართა. იდეა დიდი იყო, დრო კი – ცოტა. ასე რომ, სწორედ ამ მცირე დროის გამო გადავწყვიტე, საბოლოოდ ოთხივე შოუ გამეუქმებინა. მიუხედავად ამისა, წელს მე შევწირავ თანხას მათ, ვისთანაც ჩემი გულია და გავაკეთებ დონაციას House Full of Toys-ის ბავშვებისთვის. მომავალ წელს კი ჩვენ კვლავ დავუბრუნდებით საქველმოქმედო კონცერტს – დიდ იდეას უკვე საკმარისი დროით.”
ტრადიციის თანახმად, უანდერის ყოველწლიურ კონცერტზე მისულ მაყურებელს სთხოვენ, თან იქონიონ შეუფუთავი სათამაშო ან სასიხარულო საჩუქარი. House Full of Toys, რომელიც მუსიკოსის საქველმოქმედო ფონდ We Are You Foundation-ის ორგანიზებით იმართება, ეხმარება ბავშვებს, განსაკუთრებული საჭიროებების მქონე ადამიანებსა და ოჯახებს.
House Full of Toys-ის სცენაზე გამოსულან ისეთი მუსიკოსები, როგორებიც არიან ლაიონელ რიჩი, Queen Latifah, ჯასმინ სალივანი, ანდერსონ პაკი და ელა მეი. 2024 წლის გამოშვება კი, რომელიც მიბმული იყო უანდერის ტურნეს, სახელწოდებით Sing Your Song! As We Fix Our Nation’s Broken Heart, ჯონ ბატისტს, Lucky Daye-სა და El DeBarge-ს მასპინძლობდა.
