როგორც ჩანს, მრავალწლიანი მოლოდინი დასრულდა. 19 დეკემბერს A$AP Rocky-მ თაყვანისმცემლებს წინასაშობაო საჩუქარი გაუკეთა და მსმენელებს აუწყა, რომ მისი არაერთხელ გადადებული ალბომი – Don’t Be Dumb – 16 იანვარს გამოვა.
არტისტმა Instagram-ზე ალბომის გარეკანი გამოაქვეყნა, რომლის შექმნაშიც ტიმ ბარტონი იყო ჩართული. თავად რეპერი ამ ნამუშევარს „შედევრად“ მოიხსენიებს.
„2026 წლის 16 იანვარი – Don’t Be Dumb ხელმისაწვდომი იქნება ვინილებზე, CD-ზე, კასეტებსა და ციფრულ პლატფორმებზე. მადლობა ყველა ხელოვანს და მუსიკოსს, ვინც ამ შედევრის შექმნაში დამეხმარა“, – დაწერა Rocky-მ.
არტისტმა ბოლო ნამუშევარი – TESTING 2018 წელს გამოსცა. ამ რელიზიდან 7 წელზე მეტი გავიდა, თუმცა ფანები შემსრულებლისგან 2026 წლის ახალი ალბომით დაწყებას მაინც დიდი ენთუზიაზმით შეხვდნენ. „დაბრუნდი, თითქოს არც წასულხარ“, – წერს ერთ-ერთი მომხმარებელი.
ჯერჯერობით უცნობია, გარეკანზე მუშაობის გარდა კიდევ რა წვლილი მიუძღვის ალბომის შექმნაში ტიმ ბარტონს, თუმცა გასულ წელს Billboard-ისთვის მიცემულ ინტერვიუში Rocky-მ აღნიშნა, რომ მან თავისი მუსიკა ცნობილ რეჟისორს მოასმენინა.
„ტიმ ბარტონთან ერთად ვიჯექი და ალბომი ჩავურთე. მას ძალიან მოეწონა, თავს აყოლებდა მუსიკას და გაოცებული ამბობდა: არ ვიცოდი, თუ ასეთ მუსიკას ქმნიდი!“ – გაიხსენა რეპერმა.
ალბომის გამოშვების თარიღად 26 იანვარი მსმენელებმა ჯერ კიდევ ნოემბერში ივარაუდეს. ეს თეორია Camp Flog Gnaw ფესტივალზე გამოსვლის შემდეგ გავრცელდა, როდესაც Rocky-ს ჰუდის სახელოზე ციფრები – „01162026“ ეწერა.
