ინტერნეტში გავრცელებული კონსპირაციული თეორიები იმის შესახებ, რომ ტიმოთე შალამე სინამდვილეში ანონომურ ბრიტანელ რეპერად ცნობილი EsDeeKid იყო, საბოლოოდ გაქარწყლდა. 19 დეკემბერს, შალამე თავის „რეპ-ორეულთან“ ერთად მუსიკალურ ვიდეოში გამოჩნდა და EsDeeKid-ის ტრეკის, „4 Raws“-ის რემიქსში მიიღო მონაწილეობა.
შალამესა და EsDeeKid-ის ერთობლივ კლიპში დუეტი ჯერ სამზარეულოში ჩნდება, შემდეგ კი Rolls-Royce Wraith-ის უკანა სავარძელზე რეპავს.
„მე ტიმოთე შალამე ვარ, ასი მილიონის დაგროვებას ვცდილობ, ჩემს გოგოს კი მილიარდი აქვს” – ასე ჟღერს ტექსტი, რომელშიც შალამე კაილი ჯენერს ახსენებს.
ტიმოთი შალამე პარალელურად მომავალი ფილმის, Marty Supreme-ის აქტიურ სარეკლამო კამპანიაშია ჩართული. სარეკლამო ტურნეს ფარგლებში მან მთელი მსოფლიო მოიარა. ეს აქტივობები ჰოლივუდის ბოლო წლების ერთ-ერთი ყველაზე უნიკალური კამპანია აღმოჩნდა. სამსახიობო კარიერას შალამე 4 Raws-ის რემიქსშიც ეხება.
რეპი ტიმოთე შალამესთვის უცხო სულაც არ არის – ის ჰიპ-ჰოპის დიდი თაყვანისმცემელია და ბავშვობაში ფსევდონიმით, Lil Timmy Tim-ით რეპავდა კიდევაც.
ცოტა ხნის წინ შალამეს ინტერვიუს დროს EsDeeKid-თან კავშირზე ჰკითხეს, რასაც მან ასე უპასუხა: „ყველაფერი თავის დროზე გაირკვევა“. ეს განცხადება მან დეკემბრის დასაწყისში, ბრიტანული Heart Radio-ს ეთერში გააკეთა. ინტერვიუს ეს ფრაგმენტი ინტერნეტში მალევე ვირუსულად გავრცელდა.
თავის მხრივ, EsDeeKid-ისათვის ეს კონსპირაცია და მასთან დაკავშირებული ხმები სასარგებლო აღმოჩნდა. არტისტის ალბომის – Rebel-ის მოსმენების რაოდენობა საგრძნობლად გაიზარდა და ნოემბერში ჩანაწერმა Billboard 200-ის ჩარტში 131-ე ადგილიც დაიკავა.
ნახეთ 4 Raws-ის რემიქსის ვიდეო ტიმოთე შალამეს და EsDeeKid-ის შესრულებით:
