2026 წლის 18 ივლისს იტალიის ქალაქ რეჯო-ემილიაში, RCF Arena-ზე, რომელიც ერთ-ერთი უდიდესი ღია ცის ქვეშ მდებარე სივრცეა, 2014 წლის შემდეგ კანიე უესტის პირველი ევროპული კონცერტი გაიმართება. როგორც ორგანიზატორები ამბობენ, ეს კანიე უესტის კარიერაში ყველაზე მასშტაბური შოუ იქნება.
RCF Arena-ს 103 000 მაყურებლის მიღება შეუძლია. ბილეთების წინასწარი გაყიდვა 22 დეკემბერს Ticketmaster-ზე დაიწყება.
კანიე უესტი იტალიაში Hellwatt Festival-ის მთავარი არტისტი იქნება. ფესტივალი RCF Arena-ზე 4-დან 18 ივლისამდე, შაბათ-კვირის განმავლობაში გაიმართება, მისი ოფიციალური წარდგენა კი 2026 წლის დასაწყისში მოხდება. ორგანიზატორების თქმით, ეს იქნება განსაკუთრებული ღონისძიება შთამბეჭდავი სცენით, რომელიც რეჯო-ემილიას მსოფლიო მუსიკალური მოვლენების რუკაზე წამყვან ცენტრად აქცევს.
კანიე უესტის იტალიაში დაგეგმილი კონცერტის შესახებ ინფორმაცია თითქმის ორი წლის შემდეგ გავრცელდა. მას მერე, რაც მისი და Ty Dolla $ign-ის ერთობლივი ალბომის, Vultures ლაივ-პრეზენტაცია იტალიაში უნდა გამართულიყო, თუმცა ალბომის მხარდასაჭერი კონცერტის გეგმები ბევრჯერ შეიცვალა და საბოლოოდ კონცერტი არ შედგა. ღონისძიება მხოლოდ ე.წ. Listening Party-ებით შემოიფარგლა, რომელიც 2024 წლის თებერვალში მილანში, Unipol Forum-სა და ბოლონიაში, Unipol Arena-ზე გაიმართა.
RCF Arena-ზე Hellwatt Festival-ის ოფიციალური პარტნიორი Zamna Festival იქნება – ეს არის პრესტიჟული საერთაშორისო ბრენდი, რომელიც მექსიკის ქალაქ ტულუმში დაარსდა და გლობალური ელექტრონული მუსიკის სცენის ერთ-ერთ მთავარ ცნობილ პლატფორმად არის აღიარებული.
