მანანა დოიჯაშვილის სახელობის 27-ე საერთაშორისო ფესტივალი „საახალწლო მუსიკალური შეხვედრები“ დასასრულს მიუახლოვდა. ტრადიიციისამებრ, ფესტივალი ყოველწლიურად მასპინძლობს ცნობილი პიანისტის სოლო კონცერტს. ამ ტრადიციის ფარგლებში კონსერვატორიის დიდ დარბაზში მსოფლიო დონის არაერთ შემსრულებელს დაუკრავს. გამონაკლისი არც წლევანდელი კონცერტი იქნება და მსმენელის წინაშე ცნობილი იაპონელი პიანისტი კაცუნორი იში წარდგება.
პროგრამა ორგანყოფილებიანი იქნება და შესრულდება შუბერტისა და რაველის ნაწარმოებები.
კაცუნორი იში იაპონიის 59-ე მუსიკალური კონკურსის მესამე პრემიის, რობერტ კაზადეზიუსის სახელობის საერთაშორისო საფორტეპიანო კონკურსის მეოთხე პრემიის და ჰამამაცუს საერთაშორისო საფორტეპიანო აკადემიის კონკურსის პირველი პრემიის მფლობელია.
როგორც სოლისტი, ის თანამშრომლობს მსოფლიოში ცნობილ ორკესტრებთან და სისტემატურად მონაწილეობს საერთაშორისო ფესტივალებში. სხვადასხვა წელს კაცუნორი იში იყო ჟიურის წევრი არაერთ საერთაშორისო კონკურსზე. 2006 წლიდან ის ჰამამაცუს საერთაშორისო საფორტეპიანო კონკურსის აღმასრულებელი კომიტეტისა და ექსპერტთა საბჭოს წევრია.
პიანისტის დისკოგრაფია მოიცავს: შუბერტის ექსპრომტებს, D.935; მუსორგსკის „სურათები გამოფენიდან”; და კომპაქტ-დისკს, სახელწოდებით Words of Love, რომელიც გრანადოსის, სტრავინსკისა და შუბერტის ნაწარმოებებს აერთიანებს.
ამჟამად კაცუნორი იში ტოკიოს მუსიკის კოლეჯის პროფესორია.
