ბრიტანეთში მცხოვრებმა ცნობილმა მომღერალმა ქეთი მელუამ ვესტმინსტერის სააბატოში გამართულ საშობაო ცერემონიაში, Together at Christmas’ Carol Service-ში მიიღო მონაწილეობა. არტისტმა პირველად შეასრულა ლეგენდარული სიმღერა White Christmas, რომელიც სპეციალურად ამ საღამოსთვის ახალი არანჟირებით შეიქმნა.
„უდიდესი პატივი იყო ვესტმინსტერის სააბატოში, უელსის პრინცესის მიერ ორგანიზებულ Together at Christmas-ის საშობაო ცერემონიაში მონაწილეობა და სიმღერის შესრულება. ღონისძიების სრული ვერსია შობის ღამეს, 24 დეკემბერს, 19:25 საათზე ITV-ის ეთერში გავა.
ეს იყო ჩემი პირველი შესრულება სიმღერის White Christmas. დიდი მადლობა საიმონ ჰაუს ამ ბრწყინვალე, ახალი არანჟირებისთვის.
მადლობა უელსის პრინცესას მოწვევისთვის, ამ ღონისძიებაში მონაწილეობა ჩემთვის განსაკუთრებული გამოცდილება იყო.“ – წერს ქეთი მელუა სოციალურ მედიაში გამოქვეყნებულ პოსტში.
აღსანიშნავია, რომ ღონისძიება უელსის პრინცესის პატრონაჟით გაიმართა.
ცნობისთვის, ლეგენდარული საშობაო ჰიტი White Christmas ამერიკელმა კომპოზიტორმა და სიმღერების ავტორმა ირვინგ ბერლინმა 1942 წელს მუსიკალური ფილმისთვის Holiday Inn დაწერა. სიმღერამ მალევე მსოფლიო აღიარება მოიპოვა და ოსკარის მე-15 დაჯილდოებაზე საუკეთესო ორიგინალური სიმღერის კატეგორიაშიც გაიმარჯვა.
White Christmas პირველად ბინგ კროსბიმ შეასრულა, მისეული ვერსია Billboard-ის ჩარტის ლიდერი 11 კვირის განმავლობაში იყო. ის დღემდე ითვლება ერთ-ერთ ყველაზე გაყიდვად სინგლად შეერთებულ შტატებში. ბოლო მონაცემებით, სიმღერის დაახლოებით 10-12 მილიონი ფიზიკური ასლია რეალიზებული.
