Bedford Falls ახალ სიმღერას და მასზე შექმნილ ანიმაციურ ვიდეოს ავრცელებს. UCNAURI – ასე ჰქვია ახალ კომპოზიციას, რომელიც ბენდის მომავალი ალბომის, Lazy Bones-ის ნაწილია. UCNAURI ალბომის მეორე ტრეკია, რომელიც ჯგუფმა მსმენელს გააცნო. მანამდე, 9 დეკემბერს, პირველი სინგლი – AMBROSIA გამოვიდა.
2025 წლის დეკემბერში Bedford Falls ჟურნალ Billboard Georgia-ს რედაქტორის წარდგენით გლობალურ Billboard-ზე მოხვდა. მსოფლიოში ყველაზე გავლენიანი მუსიკალური ჟურნალის მეშვეობით ქართული ჯგუფი მრავალმილიონიან აუდიტორიას გაეცნო.
ამ პუბლიკაციას წინ უძღოდა Bedford Falls-ის ახალი ალბომის ანონსი. Lazy Bones ლეიბლ Stockton Records-ზე გამოიცემა.
2026 წლის 3 იანვარს Spacehall-ში Bedford Falls სრულმეტრაჟიან ლაივ კონცერტს გამართავს. ბენდი ძველ ჰიტებთან ერთად ახალი ალბომიდან ტრეკებსაც შეასრულებს.
Bedford Falls 2014 წელს შეიქმნა. ბენდის შემადგენლობაში არიან: დათო (ვოკალი), მიხო (გიტარა), სანდრო (დრამი და ბექვოკალი) და მიგრო (ბასი). შექმნისთანავე ჯგუფმა სწრაფად დაიმკვიდრა ადგილი სცენაზე და ერთ-ერთ გამორჩეულ მუსიკალურ კოლექტივად ჩამოყალიბდა.
ბენდის სახელწოდება შთაგონებულია ფრენკ კაპრას საკულტო ფილმით It’s a Wonderful Life, რომლის მოქმედებაც გამოგონილ ქალაქში – Bedford Falls-ში ვითარდება. ამ ქალაქის იდეა ჯგუფის იდენტობის მნიშვნელოვან ნაწილად იქცა, რადგან Bedford Falls არის ადგილი, სადაც ადამიანების ცხოვრება ერთმანეთთან მჭიდროდ არის დაკავშირებული.
