29 დეკემბერს თბილისის კონსერვატორიის დიდ დარბაზში გამორჩეული საღამო შედგება. მსმენელის წინაშე საერთაშორისოდ აღიარებული მუსიკოსი, ბერკლის მუსიკის კოლეჯის პროფესორი გიორგი მიქაძე წარდგება – ექსკლუზიური პროექტით „ქართულ სიმღერათა კრებული“ – Georgian Songbook Vol.1.
„ქართულ სიმღერათა კრებული“ საავტორო მუსიკალური პროექტია, რომელიც გიორგი მიქაძის კონცეფციით შეიქმნა. მასში შესულია მე-20 საუკუნის დიდი ქართველი კომპოზიტორების კინოსა და თეატრის მუსიკის შედევრები, რომლებიც ქართული მუსიკის ოქროს ფონდს ეკუთვნის.
პროექტის მიზანია ქართული მუსიკალური მემკვიდრეობის პოპულარიზაცია და მისი თანამედროვე ჯაზის ელემენტებით გამდიდრება. შესაბამისად, ალბომში წარმოდგენილი ნაწარმოებების არანჟირება კლასიკური ჯაზტრიოს ფორმატშია გადაწყვეტილი.
ალბომი GIORGI MIKADZE TRIO “Face to Face”, Georgian Songbook Vol.1 2023 წელს პარიზში, ერთ-ერთ პრესტიჟულ ხმის ჩამწერ სტუდიაში, Studio SEXTAN-ში Club Iveria-ს მხარდაჭერით ჩაიწერა. პროექტი მსოფლიოს არაერთ პრესტიჟულ სცენაზე შესრულდა და ჯაზის კრიტიკოსებისა და მედიისგან მაღალი შეფასებები დაიმსახურა.
ჯაზტრიოს შემადგენლობაში არიან: გიორგი მიქაძე – ფორტეპიანო, რაფაელ პანიე – დასარტყამი ინსტრუმენტები, ფრანსუა მუტენი – კონტრაბასი.
ბილეთების შეძენა შეგიძლიათ ბმულზე
