ქართულმა ალტერნატიულმა ჯგუფმა Mechanical Rainbow მსმენელს ახალი საახალწლო კომპოზიცია, სახელწოდებით „კოჯრის ტყის სიზმარი“ წარუდგინა. ნამუშევარი გამორჩეულია თავისი ნოსტალგიური ელემენტებით. სიმღერა 1978 წელს გადაღებულ მარიონეტულ ფილმს – „კოჯრის ტყის სიზმრებს“ უკავშირდება. ბენდმა კომპოზიციაში აუდიო სემპლი სწორედ ამ კლასიკური ქართული ფილმიდან აიღო.
სიმღერის მიქსინგზე ჯგუფის ვოკალისტმა, დადუ დონაძემ იმუშავა, მასტერინგი კი მუსიკალურ პროდიუსერს – Denivarlevy-ს ეკუთვნის.
Mechanical Rainbow 2018 წელს ჩამოყალიბდა და მოკლე დროში ქართული მუსიკალური სცენის ერთ-ერთ გამორჩეულ ბენდად იქცა. მათ განსაკუთრებული პოპულარობა მოუტანა ისეთმა ჰიტებმა, როგორებიცაა: HOPE, Sevdanarevi, „სდექ” და სხვა. ჯგუფმა მსმენელს არაერთი კოლაბორაციაც შესთავაზა. Mechanical Rainbow-მ სხვადასხვა დროს ითანამშრომლა ისეთ არტისტებთან, როგორებიც არიან: Kordz, სტეფანე, გიორგი გიგაშვილი.
„კოჯრის ტყის სიზმარი“ უკვე ხელმისაწვდომია მუსიკალურ სტრიმინგ პლატფორმებზე.
