ოფიციალურად დადასტურდა, რომ Air, Cassius, Daft Punk, Justice და ლეგენდარული ჟან-მიშელ ჟარი ფრანგულ კულტურაში ერთ-ერთ მნიშვნელოვან საყრდენს წარმოადგენენ.
ელექტრონული მუსიკა არამატერიალური კულტურული მემკვიდრეობის ეროვნულ ნუსხას ემატება, რაც იმას ნიშნავს, რომ ხელოვნების ეს ფორმა საფრანგეთის კულტურულ იდენტობას აყალიბებს.
„ელექტრონულ მუსიკას ჩვენი ეროვნული არამატერიალური მემკვიდრეობის სიაში სამართლიანი ადგილი უჭირავს.” – განაცხადა საფრანგეთის კულტურის მინისტრმა რაშიდა დათიმ, მას შემდეგ, რაც სამინისტრომ კლუბებს არტისტული გამოხატვისა და სადღესასწაულო სივრცის სტატუსი მიანიჭა.
განსაკუთრებულ აღნიშვნას იმსახურებს ჟან-მიშელ ჟარი, რომელმაც 20 წლის ასაკში შედევრი ალბომი Oxygène შექმნა. ალბომი ელექტრონული კომპოზიციებისგან შედგება, რომლებიც ადრეულ სინთეზატორებზე ვოკალის გარეშეა ჩაწერილი.
Oxygène – 1976 წელს გამოვიდა და მას შემდეგ გამოცემულმა ალბომებმა, მათ შორის Equinoxe და Zoolook, საფუძველი ჩაუყარეს ფრანგული ელექტრონული მუსიკის სტილს, ე.წ. French Touch-ს, რომელმაც მთელი მსოფლიო მოიცვა და დღემდე არ კარგავს უნიკალურობას.
ჟან-მიშელ ჟარი ამ სფეროში ათწლეულების განმავლობაში უწყვეტად მოღვაწეობდა. იგი იყო CISAC-ის ავტორთა საზოგადოების გლობალური კონფედერაციის პრეზიდენტი და 1993 წლიდან იუნესკოს ელჩის სტატუსით აქტიურად უჭერს მხარს ელექტრონული მუსიკის პოპულარიზაციასა და დაცვას.
2021 წელს საფრანგეთის პრეზიდენტმა ემანუელ მაკრონმა კომპოზიტორსა და არტისტს საფრანგეთის საპატიო ლეგიონის ორდენი გადასცა, რაც ქვეყნის უმაღლეს სახელმწიფო ჯილდოს წარმოადგენს როგორც სამოქალაქო, ისე სამხედრო სფეროში.
„მოხარული ვარ, რომ ელექტრონული მუსიკა საბოლოოდ იკავებს თავის ადგილს მსოფლიო კულტურულ მემკვიდრეობაში. განსაკუთრებით სამ ათწლეულზე მეტი ხნის განმავლობაში იუნესკოს ელჩისა და არამატერიალური კულტურის მხარდამჭერის როლში აქტიური ჩართულობის შემდეგ,“ – დაწერა ჟან-მიშელ ჟარმა სოციალურ ქსელში და ამ მოვლენას „ელექტრონული მუსიკისთვის ისტორიული ეტაპი“ უწოდა.
77 წლის ჟან-მიშელ ჟარი უკვე 50 წელზე მეტია, ელექტრონულ მუსიკას მსოფლიოს ყველაზე დიდ სცენებზე წარადგენს. მას კონცერტები ჩატარებული აქვს იუნესკოს მსოფლიო მემკვიდრეობის ისეთ ადგილებში, როგორებიცაა გიზის პირამიდები, აკრძალული ქალაქი, ეიფელის კოშკი, ვერსალი, მასადა, პომპეი და ბოლოს სამარყანდი. ცოტა ხნის წინ მან სამარყანდში, რეგისტანის მოედანზე, იუნესკოს 43-ე გენერალური კონფერენციის ფარგლებში დაუკრა.
საფრანგეთი ელექტრონული მუსიკის ერთ-ერთ სამშობლოდ ითვლება. თითქმის 100 წლის წინ, 1928 წელს, ფრანგმა გამომგონებელმა მორის მარტენომ შექმნა Ondes Martenot – ერთ-ერთი პირველი ელექტრონული ინსტრუმენტი, რომელსაც ორკესტრები დღემდე იყენებენ.
