Diddy-ს ადვოკატებმა ნიუ-იორკის სააპელაციო სასამათლოს მიმართეს თხოვნით, დაუყოვნებლივ გაათავისუფლონ რეპერი ციხიდან და გაუუქმონ ან შეუმსუბუბქონ პროსტიტუციასთან დაკავშირებულ ბრალდებებზე გამოტანილი ოთხწლიანი პატიმრობის განაჩენი.
ადვოკატების თქმით, ფედერალური მოსამართლე კომბსს ზედმეტად მკაცრად მოექცა და დაუშვა, რომ სასჯელის ზომაზე იმ ბრალდებების მტკიცებულებებს ემოქმედა, რომლებშიც რეპერი გაამართლეს.
56 წლის კომბსი სასჯელს ნიუ-ჯერსის ფედერალურ საპატიმროში იხდის, რომლის დატოვებაც მას 2028 წლის მაისში უწევს.
რეპერის ადვოკატები ამბობენ, რომ მოსამართლე არუნ სუბრამანიანი „მეცამეტე ნაფიცი მსაჯულივით” მოიქცა, როცა კომბსს ოთხწლიანი თავისუფლების აღკვეთა მიუსაჯა. მათი მტკიცებით, მან შეცდომა დაუშვა, როცა სასჯელის განსაზღვრისას იმოქმედა იმ ბრალდებების მტკიცებულებებითაც, რომლებშიც კომბსი გამართლდა.
ადვოკატები ამბობენ, რომ კომბსი დამნაშავედ იქნა ცნობილი ორ შედარებით მსუბუქ ბრალდებაში – პროსტიტუციასთან დაკავშირებულ დანაშაულში, რომელიც არ მოიცავს ძალადობას, თაღლითობას ან იძულებას. ისინი სააპელაციო სასამართლოს სთხოვენ, გაამართლოს კომბსი, გასცეს მისი დაუყოვნებლივ გათავისუფლების ბრძანება, ან მიმართოს სუბრამანიანს, შეამციროს მის მიერ განსაზღვრული სასჯელის ვადა.
„ამ დანაშაულებებისთვის ბრალდებულებს, როგორც წესი, სასჯელის ზომად 15 თვეზე ნაკლები ეფარდებათ, მაშინაც კი, როცა საქმეში იძულება ფიგურირებს, რაც ამ შემთხვევაში ნაფიცმა მსაჯულებმა ვერ აღმოაჩინეს,” – წერენ ადვოკატები.
სასჯელის ზომის განსაზღვრისას მოსამართლე სუბრამანიანმა ახსნა, რომ მან გაითვალისწინა კომბსის მიერ ორი ყოფილი მეგობარი გოგონას მიმართ მოპყრობა, რომლებიც ამტკიცებდნენ, რომ რეპერი მათ სცემდა და სხვა მამაკაცებთან სექსუალური კავშირის დამყარებას აიძულებდა.
სასამართლოზე რეპერის ერთ-ერთმა ყოფილმა მეგობარმა გოგონამ კეისი ვენტურამ თქვა, რომ მათი ათწლიანი ურთიერთობის განმავლობაში ათასობით შემთხვევა იყო, როცა კომბსი მას უცნობ მამაკაცებთან სექსუალურ კავშირს აიძულებდა. ნაფიცმა მსაჯულებმა ნახეს ვიდეოც, თუ როგორ ძალადობდა ფიზიკურად რეპერი ვენტურაზე ლოს-ანჯელესის სასტუმროში.
მეორე ყოფილმა მეგობარმა გოგონამ კი, რომელმაც ჩვენება მისცა ფსევდონიმით „ჯეინი”, თქვა, რომ 2021 წლიდან 2024 წლამდე იძულებით კავდებოდა სექსით მამაკაც სექსმუშაკებთან ე.წ. „სასტუმროს ღამეების” დროს, როგორც ამას თავად კომბსი უწოდებდა და რაც დღეების განმავლობაში გრძელდებოდა.
განაჩენის გამოტანისას სუბრამანიანმა თქვა, რომ ის უგულებელყოფს „დაცვის მხარის მცდელობას, მომხდარი უბრალოდ ინტიმურ, უთანხმოების გამოცდილებად, ან რიგით ‘სექსის, ნარკოტიკებისა და როკ-ენ-როლის’ ისტორიად წარმოაჩინოს.”
„თქვენ ბოროტად გამოიყენეთ ძალაუფლება და კონტროლი იმ ქალების ცხოვრებაზე, რომლებზეც ამტკიცებდით, რომ გიყვარდათ. თქვენ ისინი დაამცირეთ ფიზიკურად, ემოციურად და ფსიქოლოგიურად. ამ ძალადობას კი იყენებდით თქვენი მიზნების მისაღწევად, განსაკუთრებით მაშინ, როცა საქმე ‘სასტუმროს ღამეებს’ ეხებოდა.”
