U2-ის სოლისტმა Bono-მ შობის ღამეს ირლანდიელ მომღერალ იმელდა მეისთან ერთად თანამედროვე საშობაო ტრადიციაში მიიღო მონაწილეობა. დღესასწაულის წინ დუბლინში უკვე მეთხუთმეტედ საქველმოქმედო ქუჩის კონცერტები იმართება, რომელიც ადგილობრივი საქველმოქმედო ორგანიზაციების მხარდამჭერი ღონისძიებაა.
დუბლინის ცენტრში, Gaiety-ს თეატრის მიმდებარედ, ასობით გულშემატკივარი შეიკრიბა. Bono-მ და იმელდა მეიმ სცენაზე, ცოცხალ ბენდთან ერთად, დარლინ ლავის 1963 წლის ცნობილი საშობაო ჰიტი Christmas (Baby Please Come Home) შეასრულეს.
ტექნიკური ხარვეზის გამო ერთ-ერთი მიკროფონის მწყობრიდან გამოსვლის შემდეგ, სიმღერა ორივე არტისტმა ერთ მიკროფონთან შეასრულა.
წლევანდელი საქველმოქმედო ქუჩის კონცერტის ფარგლებში შეგროვებული თანხა დუბლინის Simon Community-ს გადაეცა, ორგანიზაციას, რომელიც ირლანდიაში უსახლკარო ადამიანებს ეხმარება. აღნიშნული ღონისძიება პირველად 2010 წელს ჩატარდა, როცა დუბლინში გრეფტონის ქუჩაზე სპონტანური ერთობლივი სიმღერით საფუძველი ჩაეყარა ახალ ტრადიციას, რომელიც დღემდე გრძელდება.
გამოცემა NME-ის ცნობით, Bono-ს და იმელდა მეის სცენაზე შეუერთდნენ ოსკარის მფლობელი მომღერალი და კომპოზიტორი, ღონისძიების ორგანიზატორი გლენ ჰანსარდი, ასევე ჯგუფ The Script-ის სოლისტი დენი ო’დონოჰიუ, Riptide Movement, დენი ო’რეილი (The Coronas) და Shobsy. საღამო ჯგუფ The Pogues-ისა და კირსტი მაკკოლის საშობაო კლასიკით Fairytale of New York-ის ერთობლივი შესრულებით დასრულდა.
გასულ წლებში Bono-ს ამ საქველმოქმედო ღონისძიებაზე არაერთხელ დაუკრავს თავის გიტარისტ The Edge-თან ერთად. მათ შორის 2018 წელს, როცა მათ ორი საშობაო სიმღერა O Holy Night და Night Divine შეასრულეს.
