Forbes-ის 29 დეკემბრის ანგარიშის მიხედვით, ბიონსემ ოფიციალურად მიაღწია მილიარდერის სტატუსს და გახდა მეხუთე მუსიკოსი ისტორიაში, რომლის ქონებამაც, გამოცემის ინფორმაციით, მილიარდ დოლარს გადააჭარბა.
Forbes-ის ინფორმაციით, არტისტმა მილიარდერის სტატუსს 2025 წელს, მაშინ მიაღწია, როცა წლის ერთ-ერთი ყველაზე შემოსავლიანი ტურნე დაასრულა. Billboard Boxscore-ის მონაცემებით, Cowboy Carter ტურნემ ზაფხულში 1.6 მილიონი გაყიდული ბილეთის შედეგად 407.6 მილიონი დოლარის შემოსავალი მოიტანა. Forbes ასევე აღნიშნავს ბიონსეს 2023 წლის Renaissance World Tour-სა და მის ბიზნესებს – Cécred-სა და SirDavis Whisky-ს – როგორც მილიარდის გამომუშავების დამატებით ფაქტორებს, თუმცა ხაზს უსვამს, რომ „მისი პირადი ქონების უდიდესი ნაწილი მუსიკიდან მოდის – საკუთარი კატალოგის უფლებების კონტროლისა და გლობალური ტურნეებიდან მიღებული შემოსავლების წყალობით“.
Forbes-ის მიხედვით, მილიარდერი მუსიკოსების ხუთეულში ასევე არის: Jay Z, ტეილორ სვიფტი, რიანა და ბრიუს სპრინგსტინი. აღსანიშნავია, რომ სხვა მედიასაშუალებებმა, განსხვავებული კრიტერიუმების გამოყენებით, მილიარდერებად ასევე მოიხსენიეს პოლ მაკარტნი, ენდრიუ ლოიდ უებერი და სელენა გომესი.
ბიონსემ 2010 წელს დააარსა Parkwood Entertainment. ამ ნაბიჯმა მას საშუალება მისცა, საკუთარი მუსიკის, პერფორმანსების, ტურნეების და ვიზუალური პროექტების მენეჯმენტი და წარმოება გაეერთიანებინა და საბოლოოდ, ამ საქმიანობებიდან მიღებული მოგების დიდი ნაწილი მასვე დარჩენოდა.
როგორც მუსიკის ერთ-ერთი უდიდესი სუპერვარსკვლავი და არტისტი, რომლის კარიერა ხანგრძლივი და ამავდროულად იშვიათად სტაბილურია, ბიონსეს ქონებას ანალიტიკოსები წლებია, აკვირდებიან. 2023 წლის დეკემბერში მან ბიზნესმედიის ყურადღება მიიქცია, როცა მისი ქონება ერთ წელიწადში 500 მილიონიდან 800 მილიონ დოლარამდე გაიზარდა. ეს მეტწილად Renaissance World Tour-ის წარმატებამ განაპირობა.
სოლო კარიერის დაწყებიდან, 2003 წლიდან დღემდე, ბიონსემ რვა სტუდიური ალბომი გამოუშვა და ყველა მათგანმა Billboard 200-ის ჩარტის პირველი ადგილი დაიკავა. მას ასევე აქვს ცხრა ნომერ პირველი ჰიტი Billboard Hot 100-ის ჩარტში.
Cowboy Carter 2025 წლის ყველაზე შემოსავლიან ტურნეებში მხოლოდ Coldplay-ს ჩამორჩა, ამ საკონცერტო ტურით ბიონსემ არაერთი რეკორდი დაამყარა – მაგალითად, გახდა Billboard Boxscore-ის ისტორიაში ყველაზე შემოსავლიანი ქანთრი ჟანრის ტურნე და ამავე დროს ყველაზე მოკლევადიანი ტურნე, რომლის შემოსავალმაც 400 მილიონ დოლარს მხოლოდ 32 კონცერტით გადააჭარბა.
