თითქმის 10 წელი გავიდა, რაც Baby Shark-ის დებიუტი შედგა, რის შემდეგაც ვიდეო ვირუსულად გავრცელდა ინტერნეტში. დღეს კი ის ცნობილი ჰიტის რემიქსს გვთავაზობს, რომელსაც ამჯერად გოჭი პეპაც უერთდება.
29 დეკემბერს საბავშვო ანიმაციური ინდუსტრიის ორი გიგანტი – Baby Shark და გოჭი პეპა გაერთიანდნენ და მუსიკალური ვიდეო Baby Shark x Peppa Pig გამოსცეს. ვიდეოში პეპა წყალქვეშა ნავით Baby Shark-ის სამყაროს აღმოაჩენს და ცნობილ სიმღერას საკუთარ ვოკალს ამატებს.
Baby Shark და გოჭი პეპა 2000-იანების საბავშვო მედიის ერთ-ერთი ყველაზე გავლენიანი პერსონაჟები არიან. Baby Shark პირველად 2016 წელს გამოვიდა. 2019 წელს მან Billboard Hot 100-ის 32-ე ადგილი დაიკავა. 2022-ში კი მისმა ვიდეომ „იუთუბზე” 10 მილიარდ ნახვას გადააჭარბა.
რაც შეეხება გოჭ პეპას, 2004 წლიდან ის ბავშვების საყვარელი ბრიტანული ანიმაციაა. ყველაზე ცნობილ გოჭს შესრულებული აქვს ისეთი ჰიტების ქავერები, როგორებიცაა BTS-ის Dynamite და კეტი პერის Roar, ასევე გამოცემული აქვს რამდენიმე საავტორო ალბომი.
„ფერადი სამყაროების შეჯახებით, ნაცნობი პერსონაჟებითა და გადამდები მელოდიით, ეს კოლაბორაცია ყველა ასაკის გულშემატკივარს მოუტანს სიხარულს,” – ვკითხულობთ პრესრელიზში. „ეს უფრო მეტია, ვიდრე დუეტი. ეს არის ორი საბავშვო გიგანტის კულტურული გადაკვეთა და ასევე პირველი შემთხვევა, როცა გოჭი პეპა სხვა საბავშვო არტისტთან თანამშრომლობს.”
