ხუთი სეზონის განმავლობაში Stranger Things ყოველთვის გამოირჩეოდა სწორ დროს სწორი სიმღერების შერჩევით, რომლებიც სერიალის ყველაზე დრამატულ მომენტებს გასდევს ფონად. და რადგანაც სიუჟეტი 1980 წელს ვითარდება, გასაკვირი არ არის, რომ ამ კვირის ფინალური სერიაც პატივს მიაგებს იმ პერიოდის ერთ-ერთ ყველაზე დომინანტურ სუპერვარსკვლავს – „პრინცს”.
მაყურებლის ნაწილს ეგონა, რომ მეხუთე სეზონის დამასრულებელი და ეპოქის შესაბამისი სიმღერა ინდი-როკ ჯგუფ The Replacements-ის რეპერტუარიდან იქნებოდა. ამ თეორიას ორი მიზეზი ჰქონდა: პირველი ის, რომ WSQK-ის დიჯეი რობინ ბაკლიმ ბოლოსწინა ეპიზოდში აღნიშნა, რომ ბენდის მუსიკა მონსტრების ბრძოლის საუკეთესო საუნდტრეკი იქნებოდა. ხოლო ამასთანავე, მსახიობმა ფინ ვოლფჰარდმა (რომელიც მაიკ უილერს ასახიერებს) მოიპოვა ბიოგრაფიული ფილმის Trouble Boys: The True Story of the Replacements გადაღების უფლება, რომლის რეჟისურასა და სცენარის შექმნასაც თავად გეგმავს.
თუმცა, ამ მიზეზების მიუხედავად, ორსაათიან ფინალურ სერიაში, რომელიც ახალი წლის ღამეს გამოვიდა, სერიალის შემქმნელმა ძმებმა დაფერებმა „პრინცის” ორი სიმღერა გამოიყენეს ლეგენდარული 1984 წლის ალბომიდან Purple Rain. ორივე სიმღერა იდეალურადაა ჩასმული სიუჟეტში და როგორც ძმები ამბობენ, მათი გამოყენების უფლების მისაღებად ძალიან გრძელი გზა გაიარეს.
„როცა იდეა მოგვივიდა, რომ სწორედ ფირფიტა იქნებოდა ბომბის ამოქმედების გამშვები მექანიზმი, მაშინვე ვიცოდით, რომ გვჭირდებოდა ეპიკური მუსიკა, თავში კი უამრავი აზრი გვიტრიალებდა,” – ამბობს როს დაფერი „ნეტფლიქსთან” საუბარში. „ვფიქრობ, არაფერია იმაზე ეპიკური, ვიდრე ‘პრინცი’. ის იდეალურად შეერწყა ჩვენს იდეას.”
როსის თქმით, ძმებს არასდროს დაუხარჯავთ იმდენი დრო ფილმის მუსიკის განხილვაზე, რამდენიც ფინალური სცენის შემთხვევაში. ის, რაც მათ საბოლოო არჩევანს კიდევ უფრო მიმზიდველს ხდიდა, არის ფაქტი, რომ „პრინცის” მუსიკა არასდროს მოგვისმენია სატელევიზიო პროექტის ან ფილმის საუნდტრეკად. „ის უბრალოდ არსად არ გამოიყენება,” – ამბობს როსი. „პრინცის მემკვიდრეობა, როგორც წესი, არავის რთავს მისი მუსიკის Purple Rain-ის ფილმის გარეთ გამოყენების ნებას.”
დაფერებისთვის Purple Rain-ის გამოყენება ძალიან შთამბეჭდავი იყო. „ის იმ მომენტის ემოციას აჯამებს,” – ამბობს როსი, ხოლო მეტი აღნიშნავს, რომ „პრინცის” მუსიკის გამოყენების უფლება მათ კეიტ ბუშის წყალობით მოიპოვეს, რომლის Running Up That Hill (A Deal with God)-ს სერიალის მეოთხე სეზონში გამოყენების შემდეგ მოულოდნელი პოპულარობა ხვდა წილად.
დაფერების თქმით, როცა მათ გაამხილეს, რომ ფინალში „პრინცის” ორი სიმღერის გამოყენება სურდათ, „გვითხრეს, რომ ამის ძალიან მცირე შანსი იყო და ჩვენც თითები გადავაჯვარედინეთ… მადლობა ღმერთს, რომ დაგვთანხმდნენ.”
პრინცის სიმღერების გარდა, ფინალურ ეპიზოდში The Rightside Up ასევე გაჟღერდა: Fleetwood Mac-ის Landslide, Pixies-ის Here Comes Your Man, Iron Maiden-ის The Trooper, Cowboy Junkies-ის Sweet Jane, ეტა ჯეიმსის At Last, Queen-ის Who Wants to Live Forever და დევიდ ბოუის Heroes.
