როჯერ უოტერსი ვენესუელაში განვითარებულ მოვლენებს ეხმაურება. მუსიკოსი სოციალურ ქსელში ვიდეოს აქვეყნებს, რომლითაც მხარს უჭერს სამხრეთ ამერიკის სახელმწიფოსა და მის დაკავებულ პრეზიდენტ ნიკოლას მადუროს.
ვიდეო იწყება წარწერით: „ვენესუელა სუვერენული სახელმწიფოა. ხელები შორს მისგან ‘გრინგოს’ (უცხოტომელები ესპანურად)”. წარწერას თან უოტერსის სიმღერა In the Fresh გასდევს, 2015 წლის ლაივ ალბომიდან Roger Waters The Wall.
ამის შემდეგ კადრში თავად მუსიკოსი ჩნდება, რომელიც ვენესუელაში მიმდინარე პროცესებზე საუბრობს:
„დილის 11 საათია, 3 დეკემბერი, 2026 წელი და შეძრწუნებული ვართ აშშ-ის ველური აგრესიით ჩვენს დებსა და ძმებზე და ჩვენს თანამებრძოლებზე ვენესუელაში – დიდი და შესანიშნავი გამოვლინება ბოლივარული რევოლუციის. ჩვენ თქვენ გვერდით ვართ! არცერთი ჩვენგანი – ღმერთმა იცის, რამდენი პროცენტი, მაგრამ, სავარაუდოდ, მსოფლიოს მოსახლეობის 99% – არ ვეთანხმებით თქვენს ქმედებებს კარიბის რეგიონში. ღმერთის გულისთვის, გაიზარდეთ! გეყოთ სულელი ბავშვებივით მოქცევა სკოლის ეზოში! ეს ჩვენი სამყაროა და არა თქვენი!
მე რომ რელიგიური ადამიანი ვიყო, ახლა პრეზიდენტ მადუროსთვის ვილოცებდი. მე არ ვარ მლოცველი, მაგრამ ვარ აქტიური ადამიანი და ყველაფერს გავაკეთებ, რაც კი ჩემს ძალებშია, რათა მხარი დავუჭირო ვენესუელას, რომელიც არის სუვერენული ქვეყანა და რომელსაც თავი უნდა დაანებონ ‘გრინგო’ ბულერებმა ჩრდილოეთიდან!”
ვიდეო სრულდება ვენესუელის დროშითა და წარწერით: „ხელები შორს ვენესუელასგან.”
როჯერ უოტერსი ცნობილია თავისი პოლიტიკური განცხადებებით, რომლებიც ხშირად კამათის საგანი ხდება. მუსიკოსი მუდმივად აკრიტიკებს აშშ-ის საგარეო პოლიტიკას, NATO-ს, მხარს უჭერს პალესტინას. დიდი გამოხმაურება მოჰყვა მის განცხადებას რუსეთ-უკრაინის ომის შესახებაც. პოლიტიკური პოზიციის გამო, უოტერსს რამდენიმე ქვეყანამ დაგეგმილი კონცერტები გაუუქმა.
