Yungblud-მა 2026 წელი გახმაურებული კოლაბორაციით დაიწყო, არტისტმა სიმღერა Zombie-ს ახალი ვერსია წარადგინა, სადაც The Smashing Pumpkins მონაწილეობს.
ეს ტრეკი აღსანიშნავია იმითაც, რომ ჯგუფ The Smashing Pumpkins-ის სამ ათწლეულზე მეტი ხნის არსებობის განმავლობაში ბენდი პირველად გამოჩნდა სხვა არტისტის ჩანაწერში.
Zombie თავდაპირველად Yungblud-ის მეოთხე სტუდიური ალბომის, Idols-ის ფარგლებში გამოვიდა. სიმღერა 2026 წლის გრემის დაჯილდოებაზე საუკეთესო როკსიმღერის კატეგორიაშია ნომინირბული, ხოლო ალბომი Idols ასევე ნომინირებულია საუკეთესო როკალბომის ტიტულისთვის.
სიმღერის განახლებული ვერსია ორიგინალი ჩანაწერის ემოციურ მუხტს ინარჩუნებს, თუმცა უფრო მძიმე ჟღერადობა აქვს. სიმღერის პირველ სტროფს თავდაპირველად Yungblud ხსნის, რის შემდეგაც მეორე სტროფში ბილი კორგანი ერთვება.
Loudwire-თან ბოლო ინტერვიუში Yungblud-მა გაამხილა, რომ Zombie-ს წერისას მთავარი შთაგონების წყარო The Smashing Pumpkins-ის მეორე სტუდიური ალბომი Siamese Dream იყო.
„როცა Zombie-ს ვქმნიდი, ფაქტობრივად Siamese Dream-ის ენერგიას ვატარებდი. ეს იყო სევდის და მელანქოლიური ემოციის ნაზავი, რომელიც ბილი კორგანის გიტარის აკორდებთან იყო შერწყმული.” – თქვა მან.
მისივე თქმით, „Zombie-ს საწყისი დემო ვერსია უფრო მძიმე ჟღერადობის იყო, თუმცა მან განზრახ შეამსუბუქა, რადგან შიშობდა, სტილით ძალიან არ დამსგავსებოდა The Smashing Pumpkins-ს.
„ყოველთვის წარმომედგინა კიდევ ერთი ვერსია“, – აღნიშნა Yungblud-მა.
ეს იდეა რეალობად მას შემდეგ იქცა, რაც Yungblud პირდაპირ დაუკავშირდა ბილი კორგანს. რამდენიმე დღეში მომღერალი ჩიკაგოში, The Smashing Pumpkins-ის მშობლიურ ქალაქში ჩავიდა, რათა ახალი ვერსია და მისთვის შექმნილი მუსიკალური ვიდეო ჩაეწერათ. ვიდეოს რეჟისორი კი ჩარლი სარსფილდია.
ეს კოლაბორაცია Yungblud-ისთვის გამორჩეული წლის გაგრძელებაა. გრემის ნომინაციების გარდა, მისი ალბომი Idols ბრიტანეთის ალბომების ჩარტის სათავეში მოექცა და Billboard-ის Top Rock & Alternative Albums ჩარტში მე-15 ადგილი დაიკავა. გარდა ამისა, Yungblud-ისა და Aerosmith-ის ერთობლივი EP One More Time – Billboard 200-ში ტოპ ათეულში შევიდა. EP-ის სინგლი My Only Angel კი Billboard-ის Hot Hard Rock Songs ჩარტში N1 ადგილზე გავიდა.
სამომავლოდ Yungblud Idols-ის ტურნეს ფარგლებში ავსტრალიაში გასტროლებს გეგმავს, არტისტი 11 აპრილიდან ასევე იწყებს ტურს ბრიტანეთში, წლის განმავლობაში კი დამატებით ტურნეს საერთაშორისო თარიღების გამოცხადებაც არის მოსალოდნელი.
