რამდენიმეწლიანი პაუზის შემდეგ სცენაზე Zagareli & Strings ბრუნდება. ინფორმაციას ამის შესახებ სოციალურ ქსელში თავად გიორგი ცაგარელი ავრცელებს.
ამ ეტაპზე დაგეგმილია ორი კონცერტი – 4 და 5 იანვარს, რომლებიც სამეფო უბნის თეატრში გაიმართება. მუსიკოსის თქმით, სცენაზე ცოცხლად შესრულდება სპექტაკლ „ზაფხულის ღამის სიზმარში” გამოყენებული მუსიკა, რომელიც გიორგი ცაგარელს, ნიკალასა და ინოლა გურგულიას ეკუთვნის.
შექსპირის „ზაფხულის ღამის სიზმარი” „ახალი ქართული თეატრის” პირველის სპექტაკლია, რომელიც დავით დოიაშვილმა შემოქმედებითი პაუზის შემდეგ დადგა. მისი პრემიერა სამეფო უბნის თეატრში 14 და 15 ოქტომბერს შედგა.
გიორგი ცაგარელსა და მის სიმებიან ორკესტრთან ერთად კონცერტში მონაწილეობას მიიღებენ მუსიკოსები: ნიკალა, ნინი ნუცუბიძე, ანამარია ბურდული და მსახიობი გივიკო ბარათაშვილი.
საღამოს პარალელურად გაიყიდება ინოლა გურგულიას ვინილიც, რომელიც 24 დეკემბერს გამოვიდა.
4 იანვრის ბილეთები სრულად გაყიდულია. 5 იანვრის ბილეთების შეძენა შეგიძლიათ ბმულზე.
