2 იანვარს, 76 წლის ბილი ჯოელმა ფლორიდაში გულშემატკივრები გააოცა, მან ბენდთან ერთად შეასრულა ორი სიმღერა, რომელიც ბილი ჯოელის ალბომის, Turnstiles-ის ოცდაათი წლის იუბილეს ეძღვნებოდა. ღონისძიება ველინგტონში მდებარე პატარა ამფითეატრში გაიმართა, სადაც სცენაზე ბილისთან ერთად მისი მეუღლე და ორი ქალიშვილიც იმყოფებოდა. ლეგენდარულმა მუსიკოსმა შეასრულა სიმღერები: We Didn’t Start the Fire და Big Shot.
„ამაღამ მუშაობას არ ვგეგმავდი“, – განუცხადა ბილი ჯოელმა გულშემატკივრებს.
პარასკევის გამოსვლა ბილი ჯოელისთვის სცენაზე პირველი დაბრუნება იყო მას შემდეგ, რაც 2025 წლის მაისში გაამჟღავნა, რომ მას ტვინის დაავადების ერთ-ერთი ფორმა, ე.წ. „ნორმალური წნევის ჰიდროცეფალია“ (NPH) დაუდგინდა. განცხადების შემდეგ მან ყველა დაგეგმილი კონცერტი გააუქმა, რათა თერაპია დაეწყო. მისი ბოლო სრულმასშტაბიანი კონცერტი 2025 წლის თებერვალში გაიმართა.
კლივლენდის კლინიკის ინფორმაციით, ეს მდგომარეობა შეიძლება გავლენას ახდენდეს აზროვნებაზე, მეხსიერებაზე, წონასწორობასა და მოძრაობაზე და ხშირად მას ქირურგიულად მკურნალობენ.
2025 წლის ივლისში, Bill Maher-ის Club Random პოდკასტში მიცემულ ინტერვიუში ბილი ჯოელმა განაცხადა, რომ თავს ნორმალურად გრძნობდა, თუმცა აღნიშნა, რომ მკურნალობას კვლავ გადიოდა.
„ეს არ არის სრულად მოგვარებული, მკურნალობა ჯერ კიდევ გრძელდება“. – თქვა მუსიკოსმა
ინსტრუმენტთან მჯდომმა ბილი ჯოელმა სცენიდან აუდიტორიას მიმართა: „კარგად ვარ. უბრალოდ წონასწორობა მაქვს ცუდი. თითქოს ნავში ვიჯდე.”
ფლორიდაში ბილი ჯოელის მოულოდნელი გამოჩენა სცენაზე შეგიძლიათ გულშემატკივრების ვიდეოჩანაწერებში ნახოთ, რომელიც Yotube-ზეა ატვირთული.
