ბიორკმა გრენლანდიის ხალხს მხარდაჭერის მესიჯი გაუგზავნა რამდენიმე დღის შემდეგ, რაც აშშ-მა ვენესუელის პრეზიდენტი ნიკოლას მადურო დააკავა.
„ყველა გრენლანდიელს წარმატებას ვუსურვებ დამოუკიდებლობისთვის ბრძოლაში,” – წერს ისლანდიელი მომღერალი ინსტაგრამზე. „ისლანდიელებისთვის დიდი შვებაა, რომ 1944 წელს მათ დანიისგან გათავისუფლება მოახერხეს. ჩვენ არ დაგვიკარგავს ჩვენი ენა (ჩემი შვილები ახლა დანიურად უნდა საუბრობდნენ) და მე თანაგრძნობით ვივსები გრენლანდიელების მიმართ.”
ბიორკის კომენტარი, როგორც ჩანს, დონალდ ტრამპის ბოლო განცხადებებმა გამოიწვია, სადაც მან განაახლა გრენლანდიის ანექსიის შესახებ საუბარი, რასაც თავად სტრატეგიული დაცვის მიზნებით ხსნის. „ჩვენ გვჭირდება გრენლანდია ეროვნული უსაფრთხოების თვალსაზრისით,” – თქვა ტრამპმა 4 იანვარს. „ეს ძალიან სტრატეგიულია. ამჟამად გრენლანდია რუსული და ჩინური გემებითაა სავსე.” ერთი დღით ადრე კი განაცხადა: „ჩვენ გრენლანდია გვჭირდება – აბსოლუტურად. ჩვენ ის თავდაცვისთვის გვჭირდება.”
გრენლანდია დანიის ნახევრად ავტონომიური რეგიონია. ტრამპის განცხადებები გააკრიტიკა დანიის პრემიერ-მინისტრმა და ამერიკას მოუწოდა, დაუყოვნებლივ შეწყვიტოს გრენლანდიის ანექსიის მუქარა. „აბსურდია საუბარი აშშ-ის საჭიროებაზე, დაიკავოს გრენლანდია. დანიის სამეფოს სამი ქვეყნიდან აშშ-ს არცერთის ანექსიის უფლება არ აქვს.”
ფრედერიკსენმა აღნიშნა, რომ დანია და, შესაბამისად, გრენლანდიაც, ნატოს წევრები არიან და „სარგებლობენ ალიანსის უსაფრთხოების გარანტიით.” მან თეთრ სახლს შეახსენა, რომ ორ ქვეყანას უკვე აქვს თავდაცვის შეთანხმება და ისტორიულად ისინი ახლო მოკავშირეები არიან.
ტრამპის მუქარას გამოეხმაურა გრენლანდიის პრემიერ-მინისტრიც, რომელმაც პრეზიდენტის რეპლიკებს უხეში და უპატივცემულო უწოდა.
„ძვირფასო გრენლანდიელებო, გამოაცხადეთ დამოუკიდებლობა!” – წერს ბიორკი პოსტის ბოლოს. „თანაგრძნობით სავსე სურვილები თქვენი მეზობლებისგან.”
