ბილი აილიშმა საკუთარი პლატფორმა აშშ-ის ემიგრაციისა და საბაჟო აღსრულების სამსახურის სააგენტოს (ICE) წინააღმდეგ გამართული პროტესტისთვის გამოიყენა. აღნიშნული ორგანიზაცია განსაკუთრებული კრიტიკის ქვეშ რამდენიმე დღის წინ მინესოტაში მომხდარი მკვლელობის შემდეგ მოექცა.
9 იანვარს, ქალაქ მინეაპოლისში საემიგრაციო ოპერაციის დროს ICE-ის ოფიცერმა 37 წლის რენე ნიკოლ გუდი მოკლა, სწორედ ამ ფაქტს მოჰყვა პოპვარსკვლავის ინსტაგრამ პოსტი, სადაც მან ორგანიზაცია მკაცრად გააკრიტიკა. პირველი იყო გრაფიკული გამოსახულება, სადაც ICE „ფედერალურად დაფინანსებულ და მხარდაჭერილ ტერორისტულ ჯგუფად“ მოიხსენია, მომღერალმა სააგენტოს ბრალი დასდო ოჯახების განადგურებაში, მოქალაქეების დაშინებაში და უდანაშაულო ადამიანების მკვლელობაში.
ბილი აილიში მეორე პოსტში მოუწოდებს აშშ-ს, რომ ICE სრულად გაუქმდეს. აქვე ჩამოთვლილია 32 ადამიანი, რომლებიც გასულ წელს პატიმრობის დროს გარდაიცვალნენ. მესამე პოსტში მომღერალი მოუწოდებს აშშ-ის მოქალაქეებს, დაუკავშირდნენ თავიანთ წარმომადგენლებს კონგრესში და მოითხოვონ სააგენტოს დაფინანსების შეწყვეტა და ასევე იმ ოფიცრის დაკავება, რომელმაც მინეაპოლისში მომხდარი შემთხვევის დროს ცეცხლი გახსნა.
დონალდ ტრამპის ადმინისტრაციის პირობებში ICE-ის ქმედებები განხეთქილების საგანი იყო, მაგრამ კრიტიკამ ამ კვირაში პიკს მიაღწია. შინაგან საქმეთა უსაფრთხოების დეპარტამენტმა, პრეზიდენტმა და ვიცე-პრეზიდენტმა ჯეიდი ვენსმა განაცხადეს, რომ გუდი აგენტებისთვის მანქანით გადავლას აპირებდა, აღნიშნულმა ოფიცერმა კი თავდაცვის მიზნით იმოქმედა. თუმცა გავრცელებულ ვიდეოკადრებში ჩანს, რომ გუდი სინამდვილეში საპირისპირო მიმართულებით მოძრაობდა.
აღნიშული ფაქტის ახსნა თავად დონალდ ტრამპსაც გაუჭირდა, როცა პირადად ნახა სროლის ვიდეო ოვალურ კაბინეტში, New York Times-ის რეპორტიორის თანხლებით. გამოცემის თანახმად, პრეზიდენტმა ვიდეოს ყურების შემდეგ თქვა: „კარგი… როგორც ვუყურებ, ეს საშინელი სცენაა.”
ბილი აილიში დიდი ხანია, საჯაროდ ეწინააღმდეგება აშშ-ის პრეზიდენტის პოლიტიკას. იგი 2024 წლის არჩევნებში ტრამპის ოპონენტს, კამალა ჰარისს უჭერდა მხარს. ცხრაგზის გრემის მფლობელმა მომღერალმა სხვა პოსტებიც გაავრცელა, სადაც მკაცრად გააკრიტიკა ICE-ის რეიდები მის მშობლიურ ქალაქ ლოს-ანჯელესში.
