50 Cent-ის ინტუიციამ და სიჯიუტემ მას რეპის დიდების გზა გაუკვალა. დღეს კი რეპერი Universal-თან იმ მილიონდოლარიანი შეთანხმების ჩაშლას იხსენებს, რამაც ის ემინემსა და Dr. Dre-სთან კონტრაქტის გაფორმებამდე მიიყვანა.
რეპერმა X-ზე ვიდეო გამოაქვეყნა, რომელშიც Irv Gotti საუბრობს, თუ როგორ ცდილობდა, დაებლოკა 50 Cent-ის შეთანხმება Universal Music Group-თან, რეპერის კონფლიქტის გამო მის ლეიბლთან.
50 Cent-მა უარი თქვა Universal-ის 1.3 მილიონი დოლარის შეთავაზებაზე. ამ გადაწყვეტილებამ კი საბოლოოდ ემინემამდე მიიყვანა, რომელმაც ის Dr. Dre-ს გააცნო. დანარჩენი კი უკვე ისტორიაა. Dre-ს Aftermath Entertainment-ის გავლით 2002 წელს რეპერმა Shady Records-თან მილიონდოლარიან კონტრაქტს მოაწერა ხელი.
„ტონი იაოს არ ესმოდა, რატომ არ ვიყავი თანახმა Universal-ის კონტრაქტზე მაშინ, როცა ისინი 1.3 მილიონს მთავაზობდნენ, ჩვენ კი ფინანსურად ძალიან გვიჭირდა,” – იხსენებს რეპერი. „მე ვუთხარი: ‘არა, შენი იყოს. ახლა ხომ ხედავ, რატომ მიყვარს ასე ძალიან ემინემი.’”
50 და ემინემი დღემდე ინარჩუნებენ ახლო ურთიერთობას. წლების განმავლობაში მათ არაერთი კოლაბორაცია ჰქონდათ, მათ შორის Don’t Push Me, Gatman & Robin და Patiently Waiting.
2023 წლის ინტერვიუში რეპერმა გაამხილა, რომ პირველი შენაძენი, რომელიც შეთანხმების ხელმოწერის შემდეგ აღებული თანხით გააკეთა, ბებიისთვის ნაყიდი „მერსედესის” მარკის ავტომობილი იყო.
„ბებიაჩემს C220 ვუყიდე. არასდროს დამავიწყდება, რადგან ეს პირველი რამ იყო, რაც კონტრაქტის შედეგად შევიძინე.”
საქმე კარგად წავიდა 50 Cent-ისთვის, რომელიც 2000-იანების რეპის ერთ-ერთ დომინანტურ ფიგურად იქცა. მან გაყიდა მილიონობით ალბომი, მუდმივად იყო ჩარტის სათავეებში და თანამშრომლობდა მომგებიან ბრენდებთან.
მიუხედავად იმისა, რომ ახალ მუსიკას აღარ გამოსცემს და აღარც ჩარტებში ხვდება, 50 Cent კვლავ რჩება ჰიპ-ჰოპ კულტურის ერთ-ერთ საყრდენად. ამ ეტაპზე ის ალკოჰოლური სასმელის ბრენდების მფლობელობაზეა კონცენტრირებული და იმავდროულად საკუთარ კინო-სატელევიზიო პროდაქშენ კომპანიას მართავს.
