გიორგი გიგაშვილი მუსიკალურ ვიდეოს აქვეყნებს, რომლის რეჟისორიც თავადვეა. „ჩემი რეჟისორობით გადაღებული პირველი ვიდეოკლიპი,” – წერს პიანისტი სოციალურ ქსელში.
ვიდეოში გიგაშვილი სერგეი პროკოფიევის მე-7 სონატის მესამე ნაწილს ასრულებს. სიუჟეტი საკონცერტო დარბაზში იწყება, სადაც პიანისტი მსმენელის წინაშე გამოსასვლელად ემზადება. ნაწარმოების პირველსავე ნოტზე კი მოულოდნელად ის დარბაზიდან გარბის.
ვიდეო ერთგვარი წარდგენაა პიანისტის ახალი ალბომისა, რომელიც დღეს, 16 იანვარს გამოვიდა. ჩანაწერში, სახელწოდებით With All My Breath And All My Blood, შედის სერგეი პროკოფიევის ნაწარმოებები: სონატები ფორტეპიანოსთვის (მათ შორის მე-7 სონატა, რომელსაც გიგაშვილი ვიდეოკლიპში ასრულებს) და „რაინდების ცეკვა” ბალეტიდან „რომეო და ჯულიეტა”, რომელსაც პიანისტთან ერთად მევიოლინე ლიზა ბათიაშვილი ასრულებს. ალბომში ასევე მოისმენთ ამავე დუეტის მიერ შესრულებულ იოსებ ბარდანაშვილის ნაწარმოებს, რომელიც გია ყანჩელს ეძღვნება.
