Tbilisi Open Air-მა ახალი ფესტივალი – Tbilisi Open Air: Winter Edition წარადგინა, რომელიც 2026 წლის ზამთრის ბოლო და გაზაფხულის პირველ დღეს, 28 თებერვალსა და 1-ელ მარტს, გუდაურში ჩატარდება.
ზამთრის ფესტივალი, ისევე როგორც ზაფხულის Tbilisi Open Air, ყოველწლიური იქნება. ფესტივალის პროგრამა გადანაწილებულია დღისა და ღამის მიხედვით, როგორც ღია, ისე შიდა სივრცეებში.
28 თებერვალს მუსიკალური ლაივები გაიმართება APRÈS SKI STAGE-ზე Marco Polo Gudauri-ს ღია სივრცეში. მსმენელის წინაშე წარდგებიან: MECHANICAL RAINBOW, სტეფანე და ჯგუფი BEDFORD FALLS. საფესტივალო დღეს ჰიპ-ჰოპ არტისტი REJJIE SNOW დახურავს.
ღამის მუსიკლურ პროგრამა HIDEOUT STAGE-ზე, Marco Polo Gudauri Tennis Courts-ის დახურულ სივრცეში გადაინაცვლებს. ღამის პროგრამაში არიან: BJAZZ 11 & TEMURIKO, SEVDA და HARRISON BDP.
1-ელ მარტს, ფესტივალის მეორე დღეს, აქტივობები მთაზე გადაინაცვლებს, სადაც TOA Ski Challenge – სამოყვარულო სათხილამურო შეჯიბრი გაიმართება და მონაწილეობის მიღება ნებისმიერ მსურველს შეეძლება. შეჯიბრის დასრულების შემდეგ დაჯილდოვდებიან სხვადასხვა ნომინაციაში გამარჯვებულები.
Ski Challenge-ის წესებისა და რეგისტრაციის შესახებ დეტალურ ინფორმაციას ორგანიზატორები თებერვალში გამოაქვეყნებენ.
დაჯილდოების შემდეგ ფესტივალი Khada Hut ‘Khijina’-ს გარე სივრცეში, Free-DOM Stage-ზე გაგრძელდება, სადაც მსმენელის წინაშე ოთახი და ANNA SUÈ წარდგებიან.
Tbilisi Open Air: Winter Edition-ის ფარგლებში გაიყიდება მხოლოდ პირველი დღის, 28 თებერვლის ბილეთები. 1-ელი მარტის საფესტივალო დღეზე დასწრება ყველასთვის თავისუფალია.
ფესტივალის შესახებ დეტალურ ინფორმაციას გაეცანით ბმულზე.
