კიტ ურბანმა დოლი პარტონს დაბადების დღე გულთბილად მიულოცა

ცნობილია, რომ ურბანსა და პარტონს ხანგრძლივი ურთიერთობის ისტორია აკავშირებთ. კიტ ურბანი ავსტრალიაში იზრდებოდა და დოლი პარტონის მუსიკას უკრავდა. სწორედ ამიტომ, ქანთრი მუსიკის სუპერვარსკვლავმა გადაწყვიტა, დოლისთვის სიყვარული და მადლიერება მისი 80 წლის იუბილეზე გამოეხატა.

კიტ ურბანმა 19 იანვარს ვიდეო გამოაქვეყნა, რომელიც თბილი აუდიოჩანაწერით იწყება – 10 წლის კიტი ბანჯოზე უკრავს და ასრულებს სიმღერას Applejack. ეს ტრადიციული ქანთრი კომპოზიციაა, რომელიც დოლი პარტონმა 1977 წელს დაწერა ალბომისთვის New Harvest… First Gathering.

„უბრალოდ იმის სათქმელად ვარ აქ, რომ ძალიან დიდი შთაგონება ხარ ჩემთვის უკვე დიდი ხანია, დოლი, და ღმერთო, მადლობა. მადლობა ყველაფრისთვის, რაც ოდესმე გაგიკეთებია. მადლობა იმ სიკეთისთვის, რომელიც სამყაროს შენი გულით, ცნობისმოყვარეობით, ვნებით და წარმოუდგენელი მუსიკალური ნიჭით შეჰმატე,“ –  ამბობს კიტ ურბანი.

ვიდეოს დასასრულს კი არტისტი ამატებს:

„გისურვებ წინ კიდევ ძალიან, ძალიან, ბევრ წელს. მიყვარხარ, დოლი.“

კიტ ურბანსა და დოლი პარტონს დიდი ხანია, ერთმანეთთან მეგობრული ურთიერთობა აკავშირებთ, რომელსაც ხანდახან სახალისო იუმორისა და მსუბუქი ფლირტის ელფერიც დაჰკრავს. 2010 წელს დოლი პარტონმა, კიტ ურბანმა და ვინს გილმა ერთად შეასრულეს ჯორჯ ჯონსის კლასიკური სიმღერა He Stopped Loving Her Today. სცენაზე ურბანის წარდგენისას პარტონმა ხუმრობით აღნიშნა:

„ვიცი, რომ მისი დედა ხშირად იყო აქ და ვგრძნობდი, რომ ის, სახლიდან ასე შორს, თავს ცოტა მარტოსულად გრძნობდა. ერთხელ წერილი გავუგზავნე, სადაც ვწერდი: მე შემიძლია, შენთვის ვიყო მეორე დედა, მეორე საყვარელი ან ის და, რომელიც არასდროს გინდოდა, გყოლოდა. ამაზე პასუხი აღარ მიმიღია.“

რამდენიმე წლის შემდეგ პარტონს ჰკითხეს, ვისთან ისურვებდა დუეტის ჩაწერას, რაზეც მან დაუფიქრებლად უპასუხა – კიტ ურბანი და დაამატა:

„ყოველთვის ვფიქრობდი, რომ ის მსოფლიოში ერთ-ერთი ყველაზე ნიჭიერი და თან ყველაზე სიმპათიური ადამიანია… მიყვარს მისი სიმღერების ტექსტები. უბრალოდ ძალიან საყვარელია. ის ჩემს ძმებს და მთლიანად ჩემს ოჯახს მახსენებს.“

კიტ ურბანმა ამ კომენტარზე ვიდეომიმართვით უპასუხა, სადაც Applejack-ის მცირე ფრაგმენტიც შეასრულა და დოლი პარტონს მადლობა გადაუხადა.

საბოლოოდ, არტისტებმა 2005 წელს ერთად იმუშავეს დოლი პარტონის დუეტების ალბომისთვის – Those Were the Days, რომელიც ძირითადად 1960-70-იანი წლების სიმღერების ქავერებს აერთიანებს. დუეტმა ერთად ჩაწერა კომპოზიცია The Twelfth of Never.

უნდა აღინიშნოს, რომ კიტ ურბანი, სრულიად დამსახურებულად, ქანთრი მუსიკის ლეგენდარული ქალბატონების ფავორიტი არტისტია. 2019 წელს, ლორეტა ლინის 87 წლის იუბილესადმი მიძღვნილ საღამოზე, რომელიც ნეშვილის Bridgestone Arena-ში გაიმართა, კიტ ურბანი სცენაზე პირდაპირ დაბადების დღის ტორტიდან ამოვიდა.