2026 წლის მარტში თბილისი საერთაშორისო მუსიკალური ინდუსტრიის ყურადღების ცენტრში აღმოჩნდება. 3-4 მარტს საქართველო მსოფლიო მუსიკოსთა ფედერაციის (FIM) ევროპული ჯგუფის მასშტაბურ ღონისძიებას უმასპინძლებს, რომელიც რეგიონში პირველად ტარდება და საქართველოს კულტურულ და პროფესიულ სივრცეში ისტორიული მნიშვნელობისაა.
ღონისძიების მასპინძელი საქართველოს მუსიკოსთა პროფესიული კავშირია (სმპკ / TUMIG), ხოლო ფორუმი სასტუმრო „ტელეგრაფში“ გაიმართება. ორდღიანი სამუშაო შეხვედრის ფარგლებში თბილისში ევროპის სხვადასხვა ქვეყნის მუსიკოსთა ასოციაციის თავმჯდომარეები, პროფესიული გაერთიანებების ლიდერები და მუსიკალური ინდუსტრიის წარმომადგენლები შეიკრიბებიან.
ფორუმის ფარგლებში ევროპული მუსიკალური ინდუსტრიის სტრატეგიული განვითარების გეგმებს, პროფესიული უფლებების დაცვის საკითხებს, თანამედროვე გამოწვევებსა და საერთაშორისო თანამშრომლობის ახალ ფორმატებს განიხილავენ. მონაწილე დელეგატები იმსჯელებენ მუსიკოსთა შრომითი უფლებების, კულტურული პოლიტიკისა და სექტორის მდგრადი განვითარების მიმართულებებზე.
აღსანიშავია, რომ მსგავსი მასშტაბის პროფესიული შეკრება საქართველოში პირველად ტარდება. სწორედ ამიტომ, FIM-ის ევროპული ჯგუფის გადაწყვეტილება, შეხვედრის ადგილად თბილისი აერჩია, მკაფიოდ უსვამს ხაზს ქვეყნის მზარდ როლს საერთაშორისო მუსიკალურ სივრცეში.
„ჩვენთვის დიდი პატივია ამ მასშტაბის ღონისძიების მასპინძლობა. ეს არის არა მხოლოდ პროფესიული აღიარება, არამედ კიდევ ერთი ნაბიჯი, რომელიც ამტკიცებს, რომ საქართველო ევროპაა. თბილისი ხდება ადგილი, სადაც ევროპული მუსიკის მომავალი და სამომავლო გეგმები განისაზღვრება,“ – აცხადებენ საქართველოს მუსიკოსთა პროფესიულ კავშირში.
დამატებით დეტალებისთვის გთხოვთ ეწვიოთ საქართველოს მუსიკოსთა პროფესიული კავშირის (TUMIG) გვერდს.
