ჰარი სტაილსის მუსიკა და ფანები ერთმანეთისგან განუყოფლები არიან. წლების განმავლობაში კი პირველად, ახალი სიმღერის, Aperture-ის გამოშვებით, ისინი, როგორც იქნა, კვლავ შეხვდნენ ერთმანეთს.
სიმღერა არტისტის მომავალ სოლო ალბომამდე რამდენიმე კვირით ადრე გამოვიდა და ის სტაილსის ახალი ეპოქის დასაწყისს აღნიშნავს – ეპოქისა, რომელიც რომანტიკით, ცეკვითა და ფანტაზიით ხასიათდება. ამ გზას One Direction-ის ყოფილი წევრი იანვრის დასაწყისში დაადგა, როცა პლატფორმა WeBelongTogether.co ჩაუშვა.
ვებგვერდი წინ უსწრებდა 15 იანვარს Kiss All the Time. Disco, Occasionally-ს დაანონსებას. მაშინ სტაილსმა ინსტაგრამზე ალბომის გამოცემის თარიღი (6 მარტი) გაამხილა და მისი ყდა გამოაქვეყნა. ამ ეტაპზე ფანებმა ჩანაწერის შესახებ ბევრი არაფერი იციან, გარდა იმისა, რომ მოიცავს 12 სიმღერას, რომლებზეც Kid Harpoon-მა იმუშავა. Aperture კი პირველი მინიშნებაა, თუ რას უნდა ელოდონ ალბომისა და სტაილსის შემოქმედების შემდეგი ეტაპისგან.
Kiss All the Time. Disco, Occasionally-ს გამოსვლიდან ორი თვის შემდეგ სტაილსი შვიდ სხვადასხვა ქალაქში რეზიდენციებს გეგმავს. პროექტი 16 მაისს ამსტერდამის ხუთი კონცერტით დაიწყება. ლონდონის, სან-პაულოსა და მეხიკოს შემდეგ კი მომღერალი ნიუ-იორკში 30 შოუს გამართავს. ტურნე ნოემბერ-დეკემბერში ავსტრალიაში დასრულდება.
სტაილსმა ბოლო ალბომი 2022 წელს გამოსცა. Harry’s House-მა ორი კვირა გაატარა Billboard 200-ის ლიდერ პოზიციაზე და მოიგო წლის ალბომის ნომინაცია 2023 წლის გრემიზე. ალბომში შედის Billboard Hot 100-ის 15-კვირიანი ლიდერი სიმღერა As It Was.
მოუსმინეთ Aperture-ს:
